Rasul

O Rasul

Manga Manara

O Singangasu ma Demo

So o jarita manena ma ngale o nyawa o Yesus iwipipiricaya (eko o Kristen ma nyawa) gena ma noma-noma o Yahudika ma nyawa manga sidongirabano. Ḋabolo de o habari ma ngale o Yesus asa isigila-gila sidago lo o nyawa ma somoa, ona o Yahudika ma nyawa yasowo o dunia ma sigilolika, so ona lo o Yesus iwipiricayaka.

Bilasu panako ma orasi o Yesus Una o Salamati ma Kolano gena isihabari waasi gena, ona o Yahudika eko o Israelka ma nyawa o Gikimoi wipiricayaka. Ona yodupa o Gikimoi Awi bobita o Musa wosilelefoka gena yamote maro manga ete de manga topora iḋoḋomaka. De manga adati de manga galepu ma somoa lo asa yamote.

Ma ngale manga moi-moi yamomote gena kanaga o Yahudi manga sidongirabaka asa o roriri o bolu muruo naga. O roriri o bolu moi o imamka, ona o Harun awi ngopa de awi danoku. De o imam manga sidongirabaka asa o nyawa womatengo wodadi ma Imam Wilalamo de una o Israel ma tonaka foloi wolamo. O imam yaratu sinoto o Gikimoi Awi Tahuka yomomanara, ona magena o imamka ma bi sahe. Manga manara gena o bi suba o nyawa yaaaho de lo o bi moi-moi o Gikimoi Awi Tahu ma rabaka yadodiahi. O imamka ma binuka yacala tumudingi ifoloi asa imateketagali o nahadi moi ma moi ma ngale o bi haiwani o nyawa isisusubaka yatola, de ma ngale ona o uku itatahu.

O roriri o bolu moili o bi guru agama. Ona yanako ḋaloha o Yahudika o bobita moi-moi o Gikimoino maro Awi Jaji Iḋoḋoma ma Buku ma rabaka isilelefo, ma boboloi ma nabi Musa awi buku ngai motoha ma rabaka, so aku ona o nyawaka yodoto ḋaloha.

O roriri o bolu moili o Sadukika ma nyawa. Ona o Israelka ma imam iḋoḋoma manga ngopa de manga danoku so ona o Yahudika ma nyawa yalalago manga sidongirabano, de o bangsa Israel manga Gikimoi Awi Tahu o Yerusalemka yapopareta. Ona isiholu o nyawa o Yesus iwipipiricaya de o buku manena ma jarita o Sadukika ma nyawa moi waasi o Yesus iwipiricaya.

O roriri o bolu moili gena o Farisika ma nyawa. Ona ifoloi yadala de o bi imamka yasowo so ka o nyawa yomomanara, eko yototoro, de o bi dokuka o agama yapopareta. Ona magena o Sadukika yaholu de nakoso o Farisika de o Sadukika, de o Yahudika ma kawasa gena o Farisika foloi yadupa.

O Yahudika ma nyawa de manga roriri gena manga adati de manga galepu yomote de yaaka komagena, so ona yadupawa de yaholu o nyawa nagoona bato ona o Yahudika yasowo, maro o nyawa ḋatotorou de manga agama ihihiwa. De lo bilasu panako o roriri yamuruo naga o Yahudika o Yesus iwipipiricaya waasi gena, ona asa o nyawa o Yesus iwipipiricayaka, bai o Yahudika de lo o Yahudika yasowo gena, yaholu de yalawangi. Duma o buku manena ma jarita asa o Yahudika yadadala de lo manga roriri yamuruo naga o Yesus maro o Salamati ma Kolano gena iwipiricayaka (ayati 6:7 de lo o Saulus o fasali siwoka). So ona o roriri o Yesus iwipipiricayaka gena o nyawa o Yesus iwipipiricaya yalawangi kawa, de o nyawa o Yahudika yasowo lo yaholu kawa.

Ma dodoguka, bilasu panako kanaga o roriri o bolu moili o nyawa o Yahudika yasowo manga sidongirabaka. Ena gena o doku moi-moika, kiaka o nyawa o Yahudika yasowo de o Yesus iwipiricayaka, asa o bi rasul <<yahiri manga roriri to ona manga gogobu ma rabaka>> (14:23) ma ngale manga piricaya yojajaga.