1 Tesalonika

O Paulus awi Surati ma Nonoma o Gogobu

O Tesalonikaka

O Singangasu ma Demo

O Tesalonika gena o Makedonia ma daeraka o doku ilalamo moi de lo iwosa o Roma ma kuasa ma rabaka. Ma orasi o Paulus o Filipi ma kotaka wodongosa, de kagena o Tesalonikaka wokahika de watolomu o nyawa o Jou Yesus wipipiricayaka la awi ngale ona magena idadi o gogobu moi. So o orasi magena una asa o habari ḋaloloha wasihabari o nyawa yangoduka o Jou Yesus iwipipiricaya waasi, bai o Yahudika ma nyawa bai o Yahudika ma nyawa yasowo de lo o Yahudika manga adati de manga galepu yamomoteka. Duma itekawa de asa o Yahudika ma nyawa o bolu moi kagena o Paulus iwidoosa de iwilawangi, sababu ma orasi ona o Yahudika ma nyawa yasowo de o habari ḋaloloha magena yoise, de ona magena o Jou Yesus iwipiricayaka (2:16). So kagena de o Paulus bilasu o Tesalonika ma kota wodongosa de wotagi wakahika o Berea ma kotaka. La ma orasi o Korintus ma kotaka womasidiado, de una asa awi dodiao moi womomanara o Timotiusno gena awi surati wamake, so komagena woise o gogobu o Tesalonikaka igogoge gena manga habari idodooha (3:2-6).