1 Korintus

O Paulus awi Surati ma Nonoma o Gogobu

O Korintuska

O Singangasu ma Demo

O Korintus gena iḋoḋomaka o doku ilalamo moi o Akhaya ma daeraka. O surati manena o Paulus walefo waasi, de o doku manenaka una ma nonomaka kagena o habari ḋaloloha wosihabari ma deka o taungu moi de ma sononga (Rasul 18:1-11). O orasi magenaka ngaroko o nyawa yadadala yoholu, duma kanaga o Korintuska ma nyawa ma binuka asa o Jou Yesus iwipiricayaka. Ma orasi o Paulus kagena de wadongosaka, de kanaga o nyawa o Yesus wipipiricaya moi, wococawaro o Gikimoi Awi demo wododoto una magena awi ronga o Apolos gena, womasidiadoli (Rasul 18:24-19:1). Una magena wosidofa o Korintus ma gogobuka wadoto (1 Korintus 3:6). Ipasaka, de o Korintus ma gogobu gena o surati moi o Pauluska ilefo la o moi-moi o kia bato iwisano unaka.