Biblica® Open New Luo Translation 2020
Zaburi 97
Jehova Nyasaye e Ruoth, omiyo piny mondo obed mamor;
dho nembe man mabor mondo obed moil.
Boche polo gi mudho mandiwa oume;
tim makare gi adiera e mise mar lochne.
Mach liel e nyime
kendo wangʼo wasike e alworane duto.
Mil polo mare menyo piny;
piny neno kendo yiengni.
Gode leny nono ka odok e nyim Jehova Nyasaye,
gileny nono e nyim Ruoth piny duto.
Polo hulo timne makare,
kendo ji duto neno duongʼne.
Ji duto malamo gik mokedi wigi okuot;
jogo gin joma sungore kuom nyiseche mopa;
nyiseche duto mondo olame!
Sayun nowinjo wachno mi obedo moil,
miech Juda bende nobedo mamor,
nikech bucheni, yaye Jehova Nyasaye.
Nimar in Jehova Nyasaye, e Nyasaye Man Malo Moloyo mohewo piny duto;
iduongʼ kendo iyombo nyiseche mamoko duto mabor.
Joma ohero Jehova Nyasaye mondo osin gi gik maricho
nimar orito ngima joge ma jo-adiera,
kendo oresogi e lwet joma richo.
Joma kare imenyonegi ler;
joma oriere gie chunygi imiyo mor.
Moruru kuom Jehova Nyasaye un joma kare,
kendo pakuru nyinge maler.
Biblica® Open New Luo Translation 2020. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.