परमेश्वरन सत्य वचन
रोमियो 6
पापन करता मरनु: मसीहमा जीवन
ते हामु काय कयजे? काय हामु पाप करता रोवजे कि फोकटन दया घोणा हुयो? कदी भी नी। हामु ज्योत्यार पापन करता मर गया ते पछा ओगव तीनाम कोसो जीवन जाय? काय तुमू नी जानता कि हामु सब ओको मसीह ईशु मा बपतिस्मा लेदा, उको मृत्यु मा बपतिस्मा लेदा। 1एरकरीन ओको न मृत्युन बपतिस्मा जुड़ने छे हामुक ओको साथे गाड़ीया, ताकि जोसो मसीह बासन महिमा क द्वारा मरला मा रईन जीवाल्लो गयो, तोसोज हामु भी नवलो जीवनन अनसारे चाल चाले। काहकि यदि हामु उको मृत्युन समानता मा उको साथे जुड़ गया छे, ते नक्की उको जीव उठनेन समानता मा भी जुड़ जाछे। काहकि हामु काजे जानता छे कि हामरा पुरानो मानुसकी उको साथे कुरूस पर चढ़ाव गया ताकि पापन शरीर नाश होय जाय, ताकि हामु ओगव पापन क पापन हको तळे मा नी रोवे। काहकि जु मर गयु, जु पाप रईन मुक्त होय गयु। एरकरीन यदि हामु मसीह साथे मर गया, ते आमरू विश्वास यो छे कि ओको साथे जीवसु भी। काहकि यो जानतु छे कि मसीह मरला मा रईन जीव उठ्यु आरू पछु कदी नी मरनु। ओको पर पछु मृत्यु ओको पर पोरबुता नी करती। काहकि आरू जु मर गयु पापन करता एकुज पुन जु नी जीवतु छे, चु यहोवा–भगवानन करता जीवतु छे। ओसो तुमू भी आपने–आपसु पापन करता ते मर चुक्यो छे, पुन यहोवा–भगवानन करता मसीह ईशु मा जीवतु समझु। अतरान करीन पाप तुमूक नश्वर शरीर मा राज नी करे, कि तुमूक उको लालुच हको तळे रोवु; आरू ने आपणा अंगोंन अन्यायन हथियार होयनेन करता पाप क सोपु, पुन खुद आपसु मरे हुओं मा छे जीवतो उठनेन समान होईन जानीन यहोवा–भगवान हवाले कर देवु। तेतार तुमु पर पापन पोरबुता नी हुयो, काहकि तुमूक व्यवस्थान हको तळे नी वरना फुकट दया तळे होय।
न्यायपन क दास
ते काय हुयो? काय एरकरीन हामु पाप करजे कि हामु व्यवस्थान हको तळे नी वरना फुकट दया तळे छे? कदी भी नी। काय तुमूक नी जानतला कि जेरी हुकुम मानने करता तु खुद आपसु दासों क समान सौप देदा। ते ओकान दास छे: चाहे पाप क, जेरो आखरीम मृत्यु छे, चाहे हुकुमन करता। जेरो आखरी न्यायीपन छे? पुन यहोवा–भगवानन धन्यवाद होय, कि तुमू जु पापन दास हुता हिमी मन रईन ओको शिक्षा माननेवाला होय गया, जिनान साँचामा नाखला गया हुता। आरू पाप छुड़ावु जाईन न्यायपनन दास होय गया। हाव उको शारीरिक दुर्बलतान कारण मानसोन रीति पर कोवतु छे। जोसो तुमूक आपना अंगोह खराब कामो क करता विटळ आरू खराब कामो न दास करीन सौपलु होतु, ओसोज हिमी आपना अंगोह चुखलोतान करता न्यायपन दास करीन सौप देवु। ज्योत्यार तुमू पापन दास हुता, ते न्यायीपन छे स्वतंत्र हता। जीन वातन करता तुमू लज्जित होय रया हता, ओको तिन टेहाव तुमू काय फव देख्या? काहकि ओको न आखरी ते रईन मृत्यु छे। पुन पाप छे स्वतंत्र होईन आरू यहोवा–भगवानन दास बनीन तुमू फव जुवड़ो ओको चुखलोता हासिल होतली छे, आरू ओको आखरी अमरकाय जीवन छे। काहकि पापन दाहाड़की ते मृत्यु छे, पुन यहोवा–भगवानन वरदान हामरा पोरबु मसीह ईशु मा अमरकाय जीवन छे।
Source notes (1)
- Cross-reference कुलुस्सियो 2:12
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.