परमेश्वरन सत्य वचन
प्रकाशितवाक्य 12
बायोर आरू अजगर
सोरगदूत पर आरू एक सोहलाणी देखाय दियो, जो दाहड़ा क पांगरी रया हुती, आरू चाँद ओका पाय तळे हुतो, आरू ओका मुनका पर बारा तारान क मुकुट हुतो; आरू ची भारपाय हयी, आरू आयड़ती हुती; काहकि प्रसव पिड़ा ओको हुयती हुती; आरू ची बाळा क जनने की पीड़ा मा हुती।
एक आरू सोहलाणी सोरगदूत मा देखाय दियो, एक मोटोत रातलो अजगर हुतो जिना सात मुनका आरू दस सींगड़ा हुता, आरू ओका मुनका पर सात राजमुकुट हुता। आरू चो वादवो क एक भाग तारा क आपसी छेमटी से एखटो करीन धरती पर न्हाख दिदो आरू चो अजगर तिनी बायोर क अगळ जो बाळा क जनम देने वाळी हुती, उबो हुय गयो कि चो बाळा क पैदा हयतात् गीळ जाए, आरू ची बायोर एक पोर्यो जनी जो लुहड़ा क राजदण्ड लीन, आखी जातिया पर राज करने पर हुतो, आरू ओको पोर्यो यहोवा भगवान क पास पुगाड़ दियो गयो। आरू ची बायोर तिना जंगल क ढास गय, जा सारीक यहोवा भगवान ओको जुगु जागो तियार करलो हुतो कि चाँ एक हजार दूय सौ साहठ दाहड़ा तक पोळे। 1
तित्यार सोरग मा लड़ाय हुय, मीकाईल आरू ओका सोरगदूत अजगर से लड़ायने क निकळिया; आरू अजगर आरू तेखा उको से लड़ाय करिया, पुन सक्षम नी हयु, आरू सोरग मा ओको करता ओळी जागु नी रयु। 2आरू त्यो मोटलो अजगर त्यो पेहलो घड़सो, जो शैतान कहवाये, आरू आखी कोळजुग क भटकाड़ने वाळो छे, त्यो धरती पर गिराय दियो गयो; आरू तेखा सोरगदूत तेखेत् साते गिराय दिया गया।
औळी हाव सोरग से यो मोटो बुल आवतलो सुन्यो, “हाय हामरा यहोवा भगवान क छुटकारो, शक्ति, राज्य, आरू ओगळ मसीह क हक प्रगट हुए छे; काहकि हामरा भाईयो बहनीन पर दोष लागावनेवाला, जा रात दाहड़ा हामरा यहोवा भगवानन ओगळ उका पर दोष लागाड़ीया करता हुता करीन सोरग रईन नेड़ा पाड़ दिदा। आरू त्या गाड़ गाडरा क लुहूय यो क कारण, आरू गवाय क कारण, आरू वचन क कारण तेखा पर जीक गया, काहकि त्या उको जीवन क मोंग नी जानिया, या तक कि मोत क भी छेल लेदा। इना कारण से ए सोरगदूत आरू तेखाम रहवने वाळा खुश हयो; ए धरती, आरू दरिया, तुमरे पर विखु काहकि शैतान दुस्मन घणी रीस क करीन उतरी आवलो छे; काहकि त्यो यो जाने कि हाय टेम कम रहलो छे।”
जत्यार अजगर यो देखियो कि, हाव धरती पर गिराय दियो गयो, ती त्यो त्या बायोर क पछोळ पड़ गयो पर त्या बायोर क दुय मोटा पाखाड़ा आपी दियो, कि घड़सा क ओगळ से उड़ीन जंगल मा उना जागा पर जा पुग नी सके जहा वो एक समय, आरू समय आरू आधा समय तक पावली जाए। आरू तिने टेमे त्यो घड़सो त्या बायोर क पछोळ आपसा मुय से नदी सारको पानी उहवाड़ियो कि उको इना पानी से उहवाड़ देय। पुन धरती त्या बायोर की आरू आपसा मुहय उगाड़ ़ीन उका नदी क जु अजगर क आपसो मुहय मा रईन वह्याड़ी होती, आरू पी लेदी। तत्यार अजगर बायोर पर कीचवायो, आरू तेखी वाचली ओवळियाद से जो यहोवा भगवान क हुकुम क माने, आरू गवाय देने पर वातड़ा उबा रया, लड़ायने करीन गयो आरू चो दरिया क रेत पर जाईन ऊबो हुयो।
Source notes (2)
- Cross-reference यहूदा 1:9
- Cross-reference लूका 10:18
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.