परमेश्वरन सत्य वचन
मीका 2
गरीब क वेला पाड़ने वाळान क वीखु
वीखु छे उन लोगहन पर, जो खाला पर पड़ीयो पड़ीयो बुराय क वाराम वीचार करीया करे आरु भुण्डला काम न मरजी राखे, आरु ताकत वाळा हुयनेन कारण सोण्दारा मा नीकळतात् हेको पूरो करे। त्या खेतोन लालुच करीन हेनको हापकी लेय, आरु हेनका घरन लालुच करीन हापकी लेय; आरु हेनका घोरानान क सात मा ओदेमड़ा पर, आरु हेका आपसा वाटा न क सात मा काहला ओदेमड़ान क धुको देय आरु वेला पाड़े। इना कारन, योहोवा यो कये; हांव इनी जाती पर असली पीड़ा नाखने वाळो छे जीना सी तुमु आपसा क वाचाड़ नी सके। आरु आपसो माथ उचो करीन चाली नी सके। काहकी यो पीड़आन टेम हुयसे। उना टेम पर तुमरा समाजन दु:खन गीत दाखलान रीतीये गावसे। हामरो ते नास हुय गीयो; त्यो म्हार कतरो दुर कर देय, त्यो मारो खेत धुको करने वाळान क हात मा आप देय। योहोवान यो बुल छे, की मण्डळी मा चिट्ठी न्हाकीन आरु दुवड़ा सी मापीन जागु वाटने वाळो कोय नी रयसे, आरु धरतीन टुकड़ो बी नी जड़े। बक बक करने वाळा कया करे, बकबक मा करो। इनी वातन करीन मा कया करो। असला लोगहन मा सी वीजुत नी रये। ए याकुब न घोराना, काय यो कयनो जुळे की योहोवान आत्मा मा गम नी हय? काय यो काम हेकोत् वाटे हुयला छे? काय मारा वचनो सी हेको सुतरो नी हुयतो जो खरो चाले? पुन कालुन वात छे की मारी परजा दुस्मन बनी मारे वीरुध मा उठली छे; तमु सुतरा आरु भुळा भाळा वाट्ये चालने वाळान डील पर रयीन चिंदरा हापकी लेय। जो लड़ाईन वीचार नी राखीया आरु नीचळा जात रीया। मारी मानसो बाय जात क तमु हेनका सुखवाळा घर मा रयीन नीकाळ देय; आरु हेनका नानला पोर्या पारी सी तमु मारी आपली वारली चीजन क जलोमकी हापकी लेय । उठो आरु जात रयो यो आरामन जागो नी हय। इना कारण तमरी वीटळ छे जो वातड़ा दु:खन क सात मा तुमरो नास करसे कदाम कोय झुटला जीवन लारे चालता हय, झुटी आरु रीकामी वात हांव लोगत अंगुरन रस आरु मोंदन परचार समळावतो रयीस, ती त्यात् लोगहन क कागळीयो बनसे। ए याकुब, हांव पाको तमु सबन क एखटा करीस; हांव इसराएलन वाचलाक पाको एखटा करीस; आरु वाड़ान गाडरा बुकड़ान क सारको एक सात मा राखीस। उना टुळान सारको जो वारला चारान जागाम हय, त्या मानुस जादा हुयनेन कारण सी हुराड़ो मचावसे। हेको अगोळ अगोळ वाड़ान क तुड़ने वाळो गीयो, अतरान करीन त्या बी हेको तुड़ी रीया, आरु फाटक मा रयीन नीकळीन जाय रीया; हेनको राजा हेनका अगोळ अगोळ गयो मतलब योहोवा हेनको मालिक आरु अगळवानीयो छे।
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.