परमेश्वरन सत्य वचन
लैव्यव्यवस्था नी किताब 8
हारून आरू ओकान पोर्या क अभिषेक
(निर्गमन 29:1-37)
ओळतेन योहोवा मूसा सी कयो “तू हारून आरू ओकान पोर्या क छिंदरा, आरू अभिषेक क तेल, आरू पापबलि क केवड़ा, आरू दुयु गाडरा, आरू अखमीरी रूटो क टुकरा क मिलापवाळा तम्बू क झोपला पर ली आया, आरू चान सब मण्डली क इकठा कर।”
योहोवा क ओका हुकुम क अनसारे मूसा कर्या मण्डली मिलापवाळा तम्बू क झोपला पर इकठा होया। तव मूसु मण्डली सी कोया, “जो काम करनेक हुकुम योहोवा आप ददो छे चो यो छे।”
ओळतेन मूसा हारून आरू हेका पोर्यान क साते ली जाईन पानी सी उंगवाळ्यो। तव ओको उनाक चौगला पेहरायो, आरू पट्टो लेपट्यो आरू धंगड़ो पांगरायो, आरू एपोद लागाड़ीन एपोद क काढ़ा होया पट्टा सी याजकन छिंदरा क बाँधीन कस देदा। आरू उका सिनाबंद लागाड़ीन सिनाबंद मा ऊरीम आरू तुम्मीम मेक देदा। तव ओको ओकान मुनका पर पागड़ी बाँधीन पागड़ी क सामने सोनान पट्टी क, मतलब पवित्र मुकुट क लागाड्या, जेका प्रकार योहोवा मूसा क हुकुम देदी हती।
तव मूसु अभिषेक क तेल लीन निवास आरू जो काहय ओकामा हतो उना सब क भी अभिषेक करीन हेका चुखलो कर्या। आरू उका तेल मा सी काहय उनी वेदी पर सात वार छिड़कीयो, आरू आखा समान क साथ वेदी क आरू हेका ठिकरा चुखो करियो। आरू ओको अभिषेक क तेल मा सी काहय हारूनन मुनका पर न्हाखिन ओकान अभिषेक करीन ओकाह चुखलो कर्या। ओळतेन मूसु हारून पोर्याक सामने ली आवीन, अंगरखा पेरावीन, कड़ीयाम पट्टो बाँधिन ओकान मुनका पर टुपी मेक देदा, जेका प्रकार योहोवा मूसा क हुकुम देदी हती। तव त्यो पापबलिन केवड़ा क सामने ली गोया; आरू हारून आरू ओकान पोर्यो आपना आपना हाथ पापबलि क केवड़ा क मुनका पर मेक्या। तव चा बलि कर्या गोया, आरू मूसु लुहूय लीन आंगवी करीन वेदीक च्यारू सिंगळा पर लागाड़ीन चुखलो कर्यो, आरू लुहूय वेदी क पाय पर उंडेल देदो, आरू ओकान करता पश्चाताप करीन ओकाह चुखलो कर्या। आरू मूसा आतड़ा परली सब चरबी, आरू काळजा परली चरबी, आरू चरबीन क सात मा दुयु गुर्दान क लीन वेदी पर धपाड़ियो। पुन केवड़ा मा सी जो काहय वाच गयो हेको, गुबरन सात हेकी खाल आरू मांस क ओको पड़ाव सी बाहरते आग्ठा मा धोपाड़ दिदो, जेका तरह योहोवा मूसा क हुकुम देदो हतो।
ओळतेन चा होमबलि क गाडरा क सामने ली गोया, आरू हारून आरू ओकान पोर्यो आपना आपना हाथ गाडरा क मुनका पर मेक्या। तव चा बलि कर्या गोया, आरू मूसु ओकान लुहूय वेदी पर चार तरफ छिड़क्या। तव गाडरा क टुकड़ा टुकड़ा कर्या गोयो, आरू मूसा मुनको आरू चरबीन क सात टुकड़ा क धोपाड़ दिदो। तव आतड्या आरू पाय पाणी करीन धुव्या गोया, आरू मूसु पुरा गाडराक वेदी पर धोपाड्या, आरू चा सुखदायक सुगन्ध आपने क करता होमबलि आरू योहोवा क करता बलिदान होय गोया, जेका तरह योहोवा मूसा क हुकुम देदो हतो।
ओळतेन चा दीसरा गाडरा क जो अभिषकन भेंट क गाडरो हुतो सामने ली गयो, आरू हारून आरू हेका पोर्या आपसा-आपसा हाथ गाडरा क मुनका पर मेक्यो। तव चो बलि कर्यो गोया आरू मूसु ओकान लुहूय मा सी काहय लीन हारून डाखरे कान क मुनका पर आरू ओकान डाखरे हाथ आरू डाखरे पाय क ऊमठा पर लागाड्या। आरू चु हारून क पोर्याक सामने ली गोयो, आरू लुहूय मा सी काहय एक एक डाखर्या कान क मुनका पर आरू डाखर्या हाथ आरू डाखर्या पाय क ऊमठा पर लागाड्या; आरू मूसु लुहूय क वेदी पर चार तरफ छिड़क्या। आरू ओको चरबो, आरू चरबीदार शेमटी, आरू आतड्या परली सब चरबो, आरू कावजा परली झिल्ली समेत दुयु गुर्दा, आरू डाखर्या जाँग, या सब लीन अलग मेके; आरू अखमीरी रूटा क टुकरो जो योहोवा क ओगव मेकला हता ओकाम माहयलो एक रूटो, आरू तेल करीन झारलो मयदा क एक पुरी, आरू एक रूटो लीन चरबो आरू डाखर्या जाँग पर मेक देदा; आरू या सब चीज हारून आरू ओकान पोर्या क हाथ पर धर देदी गई, आरू हिलान क भेट क करता योहोवा क ओगव हालाया गोया। तव मूसा हेकेक हेनका हाथ पर सी मा लीन हेका वेदी पर होमबलि क ऊपर धोपाड्या, यो सुखदायक सुगन्द आरू यहोवान क लियन आग्ठान भेट हुती। तव मूसु छाती क लीन हिलाने क भेट क करता योहोवा क ओगव हालव्या; आरू संस्कार क गाडरा मा सी मूसा क भाग यो होयो जोसो योहोवा मूसा क हुकुम देदी हती।
तव मूसु अभिषेक क तेल आरू वेदी पर लुहूय, दुयु मा सी काहय लीन हारून आरू ओकान छिंदरा पर, आरू ओकान पोर्याक आरू उनाक छिंदरा पर भी छिड़क्या; आरू ओकान छिंदरा समेत हारून क भी चुखलो कर्या।
तव मुसू हारून आरू ओकान पोर्या सी कयो, “मांस क मिलापवाळा तम्बू क झोपला पर रांदु, आरू उका रूटा कजो संस्कार क टुकरा मा छे चो खाऊ, जोसो हाव हुकुम देदी छे कि हारून आरू ओकान पोर्यो ओकाह खाएँ। आरू मांस आरू रूटा मा सी जो शेष रय जाए ओका मा धोपाड़ देनु। जव तक तुमरा संस्कार क दाहड़ा पुरो नी होय तव तक, मतलब सात दाहड़े तक मिलापवाळा तम्बू क झोपला क बाहरते जानु, काहकी वा सात दाहड़े तक तुमरो संस्कार करतो रवसे। जेका प्रकार आज कर्या गोया छे तोसाज करने क हुकुम योहोवा देदो छे, जेका सी तुमरो पाप ढाकाय जासे। एरकरता तुमु मिलापवाळा तम्बू क झोपला पर सात दाहड़े तक ठहरे रयनु, आरू योहोवा क हुकुम क मामनु, ताकि तुमु मर नी जावु; काहकी ओसोज हुकुम मखे आपी गई छे।” तव योहोवा क इनाक सब हुकुम क अनसारे जो ओको मूसा क द्वारा देदी हती, हारून आरू ओकान पोर्यो कर्यो।
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.