लैव्यव्यवस्था नी किताब 27

मानतान नेम

1योहोवा भोगवान मुसा काजे कोयु, 2“ इसराएली मानसो काजे ओसु कोवजी कि जोत्यार खास मानता माने, ती मानता कोरला जीव तारे कोवनेन ओनसारे योहोवा भोगवानोन होयसे; 3एरकरीन कोदाम चु वीस सालोन नीते हेरेसी जादा आरू तीन वीस साल गोथु कोम उमोरोन ओदमी होय, ती तेरे जुगु चुखला जागान चांदीन सिक्कान ओनसारे पोचास सिक्का कोवाये। 4कोदाम ची बायोर होय, ती तीस चांदीन सिक्का रोवसे। 5ओळी कोदाम तेरी उमोर पाच साल नीते तेरेसी जादा आरू वीस साल गोथा कोमोन होय, ती पुर्या जुगु वीस सिक्का, आरू पुराय जुगु दोस सिक्का। 6कोदाम तेन्दरी उमोर एक मोहनान नीते तेरेसी जादा आरू पाच साल गोथी कोम होय , ती पुर्या जुगु पाच सिक्का आरू पुर्या जुगु तीन सिक्का कोवाये। 7ओळी कोदाम तेरी उमोर तीन वीस साल होय नीते तेरेसी जादा होय, चु ओदमी होय ती तेर जुगु पोन्दरे सिक्का, आरू बायोर जुगु दोस सिक्का कोवाये। 8पुन कोदाम कुदु ओतरू गोरीन होय कि पुजारान आकलो दाम आपी नी सोके, ती तिनाक पुजारा ओगोव उबु कोरजु, आरू पुजारू तेर जुगु टोका आकसे, मोतलोब जोतरी मानता कोरनेवा सी होय सोके, पुजारू तेरेत हिसावे मेकसे।

9“ओळतेन जेनु ढुरोम गोथा योहोवा भोगवान काजे चोड़ावु, कोदाम ओसी काहनी मानता होय, ती जु ढुर कुदु योहोवा भोगवाग काजे आपे चो चुखलो कोवायसे। 10मानता चोड़ावने वावु काहने वी भातीन नी बोदले, नी ते चु बुरान बोदले वारू, आरू नी वारलान बोदलाम भुन्डो आपे; आरू कोदाम चु तेना ढुरोन बोदलाम दिसरो ढुर आपे, ती चो आरू हेरू बोदलु दुयु चुखला कोवायसे। 11कोदाम चो ढुर विटोळ होय, जिनाक योहोवा भोगवान काजे चोड़ावा मा नी चोड़ाया होय, ती मानता राकने वावु मानुस ओसु ढुर पुजारा ओगोव उबराखसे। 12पुजारू ढुरोक पारेखसे की चो वारू होय की नी। जोसो पुजारा काजे पारोखने मा मालुम पोड़े , तोसोत् मानसे। 13पुन कोदाम मानता राखने वावु तिनाक काहने रिते छुड़ावने हिन्डे, ती जु दाम पुजारू कोवसे तेरेम पाचवु वाटु आरू जुड़ीन आपसे।

14“ओळी कोदाम कुदु मानुस आपसा घोरो जुगु मानता मानतु होय कि हेरो घोर मारा पोरबु जुगु चुखो रोवे, ती पुजारू तेरा वाराम विचारीन कि वारू छे की भुन्डो छे; आरू जोतरो पुजारू कोवे तेर हिसाबे दाम होतरोत रोवसे। 15आरू कोदाम घोरोक चुखो कोरावने वावु तिनाक छुड़ेवने हिन्डे, ती जोतरा रूप्या पुजारू तेरो दाम कोयु होय तेरेम रोईन पाचवु वाटु आरू बोड़ावीन आपे, ती चो घोर तेरोत रोवसे।

16“कोदाम कुदु मानुस आदसी जागान वाटु योहोवा भोगवान जुगु चुखी कोरावने चाहाय, ती हेरो दाम ऐर ओनसारे होयसे कि तिना खेतोम कोतरो बिज पोड़से; जोतरा जागामा कांगनी भोरीन जोव गोंहोव पोड़े तोतरा जुन दाम पोचास चांदीन सिक्का कोवायसे। 17कोदाम चु जुबली वावा सालोम चुखो कोरावे, ती तेरो दाम तार कोवले होयनो जुवे। 18पुन कोदाम चु जुबली वावा सालोन ओळतेन आपसा खेतोन मानता मानसे, ती जोतरा साल आवने वावा जुबली वावा साल वाच रोवसे, तेर हिसाबे पुजारू खेतोन हिसाब लागाड़से, आरू तुमरे हिसाबो मा सी कोम होये। 19आरू कोदाम खेतोन चुखो कोरावने वावु तिनाक छुड़वी लेनो चाहाय, ती जो दाम पुजारू कोवलु तेरेम गोथो पाचवु वाटु आरू वोदाड़ीन आपसे, ती खेत तेरोत रोवसे। 20पुन कोदाम चु खेत काजे छुड़ेवने नी चाहाय, कोदाम चु आपसा खेतोक दिसरा मानसोक वेच देसे ती पोछो छुड़ाय नी सोके। 21पुन जोत्यार चु खेत जुबली वावा सालोम छुटे, तोत्यार पुरी रिती सी चोड़ावला खेतो जोसो योहोवा भोगवान जुगु चुखलो कोवाये, चु पुजारान आपसु जागु होय जासे। 22ओली कोदाम कुदु आपसो मुले लेदला खेत, जु आपसु वाटान खेतोन नी रोवे, योहोवा जुगु चुखलो कोवायसे। 23ती पुजारू जुबली वावा साल लोगुन हिसाव कोरीन तिना मानुस जुगु जोतरो कोवे तोतरोत् चु योहोवा जुगु चुखो जानीन तेनेत् दाहड़े आप देय। 24जुबली वावा साल मा चु खेती तेरेत् होकोम जेरेसी चु मुले लेदु होय ओळी आय जाय, जेरू खास वाटु छे तेरूत् पोछु होय जाय। 25आखो हिसाब चुखला जागान तुलो मा होयसे। चांदीन एक सिक्कु बारे गोरामोन होयसे।

26“पुन पावन्या ढुरोन पेहलो वाछड़ो, जो पेहलो होयने कोरता योहोवा भोगवानोन कोवाये, तिनाक कुदु मानता नी मानसे; चाहय चो वाछड़ो होय, चाहाय गाडरो बुकड़ीन गिदल्यो, चो योहोवा भोगवानोन छे। 27बाखुन कोदाम चो विटोळ ढुरोन होय, ती तिनाक चुखो कोवाड़नेवावु तिनाक पुजारान कोवला दामोन ओनसारे तेरु पाचवु वाटु आरू वोदाड़ीन छुड़ाय सोके; आरू कोदाम चु नी छुड़ावे, ती पुजारान कोवला दामोन ओनसारे वेचाय जाय।

28“बाखुन आपसी आखी चिजोम गोथो थुड़ोक कुदु योहोवा भोगवान जुगु चोड़ाया कोरे, चाहाय मानुस होय चाहाय ढुर, चाहाय आपसा वाटान खेत होय, ओसी काहनी चोड़ावली चिज नी वेचाये आरू नी छुड़वे; जो काहिन चोड़ावलो छे चो योहोवा जुगु बेसको चुखलो कोवाये। 29मनुस मा गोथो जो काहिन मोतोन डोन जुगु चोड़ावलो होय छुड़वी नी सोके; पाको चो मार नाख्यो जाय।

30“ ओळी खेतीन मेरोन दोसवु वाटु, चाहाय चु खेतीन बिज होय चाहाय झाड़ोन फोव, चो योहोवा भोगवानोन छे; चो योहोवा जुगु चुखलो कोवाये। 31कोदाम कुदु आपसा दोसवा वाटाम गोथु काहिन छुड़ेवने चाहाय, ती पाचवु वाटु वोदाड़ीन तिनाक छुड़ावे। 32आरू गाय-बुईल, आरू गाडरा-बुकड़ा, जे-जे ढुरे गिनने जुगु लाकुड़ोन नेचा सी निकवी जाने वावा छे तेरो दोसवु वाटु, दोस दोस पोछोव एक एक ढुर योहोवा जुगु चुखलो कोवाये। 33कुदु वारू भुन्डान पारोख नी कोरे, आरू नी तेर बोदलाम; आरू कोदाम कुदु तेर बोदले वी लेये, ती चो आरू तेरे बोदले वावो दुयु चुखला कोवाये; आरू चो कोदी नी छुड़ावसे।”

34जो हुकुम योहोवा भोगवान इसराएली मानसो जुगु सिनाय बोयड़ा पोर मुसा काजे आपलु होतु चे येत् छे।