परमेश्वरन सत्य वचन
लैव्यव्यवस्था नी किताब 23
पर्वोंक विधि
पछा यहोवु मूसा सी कयो, “इस्राएलिया सी कया कि योहोवान तिवार जेकान तुमुक पवित्र सभा एकठी करनेक करता नेमला टेमो पर प्रचार करनु पड़से, मारा या तिवार या छे। छव: दाहड़ा काम-काज कर्या जासे, पुन सातवे दाहड़े परमआरामम तरफ पवित्र सभान दाहड़ु छे; ओकामा काहना प्रकारन काम-काज नी कर्या जासे; चा तुमरा सब घर मा योहोवाक आरामन दाहड़ा ठरसे।
फसह आरू अखमीरी रोटान तिवार
“पछा योहोवान तिवार जेकामा सी एकेकान ठराया होए टेमो मा तुमुक पवित्र टुळु करनेन करता प्रचार करनो पड़से चा या छे। पेहले महिनान चौदवे दाहड़े शान्तीन टेमे योहोवान फसह होया करे। आरू उके महिनान पंद्रावे दाहड़े योहोवान करता अखमीरी रोटान तिवार होया करे; ओकामा तुमु सात दाहड़े तक अखमीरी रोटा खाया करनु। ओकामा पेहलो दाहड़ो तुमरी पवित्र सभा होसे; आरू उके दाहड़े मेहनतन कुई काम नी करनु। पुन सातु दाहड़े तुमु योहोवान हव्य चढ़ाया करनु; आरू सातवे दाहड़े पवित्र सभा होसे; उके दाहड़े मेहनतन कुई काम नी करनु।”
पछा योहोवा मूसा सी कयो, “इस्राएलिया सी कया कि जव तुमु उका देश मा प्रवेश करहत जेका योहोवा तुमुक आपतु छे आरू ओकामा खेत काटु, तव आपना आपना पाकला खेतन पेहली कमाईन पूला याजकन जु ली आया करनु; आरू चु उका पूलाक योहोवान सामने हालाड्या, कि चो तुमरे निमित्त ग्रहण कर्या जासे; चो उका आरामन दाहड़े दिसरे दाहड़े हालाड्या। आरू जेके दाहड़े तुमु पूला हालाड़े उके दाहड़े एक सालन निर्दोष गाडरान बच्चा योहोवान करता होमबलि चढ़ाना। आरू ओकान साथेन अन्नबलि एपान दुय दसवो अंश तेल सी झारीन मैदान होसे, चो सुखदायक सुगन्धान करता योहोवान हव्य होसे; आरू ओकान साथेन दूय लीटर भरीन पीने वाळो दाखरस चढ़ावाए । आरू जव तक तुमु ओका चढ़ावाक आपना परमेश्वरक जु नी ली जावु, उके दाहड़े तक नोवला खेत मा सी नी ते रोटो खानु आरू नी भूजलो अन आरू नी हरी बाले; यी तुमरी पीढ़ी पीढ़ी मा तुमरा सब घराना मा हमेशान विधि ठरसे।
काटनेन पर्व
“पछा उका आरामन दाहड़ान दिसरे दाहड़ा सी, मतलब जेके दाहड़े तुमु हिलाड्या जानेवाळी भेंटन पूलेक लावसु, उका दाहड़ा सी पूरा सात आरामन दाहड़े गिन लेनु; सातवा आरामन दाहड़ान दिसरे दाहड़े तक पचास दाहड़ा गिन्नु, आरू पचावे दाहड़े योहोवान करता नोवला अन्नबलि चढ़ावनु। तुमु आपना घरो मा सी एपा क दुय दसवु अंश मैदान दुय रोटा हालावनेक भेंटन करता ली आवनु; चा खमीरन साथे रांदायनु जुवे, आरू योहोवान करता पेहली कमाय ठरसे। आरू उका रोटान संग एक एक सालन सात निर्दोष गाडरान बच्चा, आरू एक बछड़ो, आरू मेंढा चढ़ावनु; चा आपना आपना साथे वाळा अन्नबलि आरू अर्घ समेत योहोवान करता होमबलिन समान चढ़ावनु जासे, मतलब चा योहोवान करता सुखदायक सुगन्ध आपनेवाळा हव्य ठरसे। पछा पापबलिन करता एक बुकड़ो, आरू मेलबलिन करता एक एक सालन दुय गाडरान बच्चा चढ़ावनु। तव याजक उकाह पेहली कमाईन रोटा समेत योहोवान सामने हालावनेक भेंटन करता हालाड्या, आरू इना रोटान संग चा दुय गाडराक बच्चा भी हालाड्या जासे; चा योहोवान करता पवित्र, आरू याजकन भाग ठरसे। आरू तुमु उके दाहड़े यो प्रचार करनु कि आज हामरी एक पवित्र सभा होसे; आरू मेहनतन कुई काम नी करनु; यो तुमरा सब घराना मा तुमरी पीढ़ी पीढ़ी मा हमेशान विधि ठरसे।
“जव तुमु आपना देश मा खेत काटु, तव आपना खेत न कानोक पुरी रीती सी नी काटनु, आरू खेत मा पड़ला होया झोठाक नी एकठा करनु; उका दीनहीन आरू परदेशीन करता छुड़ देनु; हाव तुमरो परमेश्वर योहोवा छे।”
नोवा-सालन
भोगवान मुसा काजे कोयु, तु इसरायली काजे यो कोव: सातवे मोहनान पेहले दाहड़े बेस चुखलु दाहड़ु वावजु। एनाक फोम कोरावने जुगु मोटला फेपारीया वाजाड़जु, आरू एक चुखली मिटिंग एकठी होयनो जुवे। तुमु काहने वी भातीन मेहनोतोन काम झुन कोरता। तुमु योहोवा जुगु आगठान बादा चोड़ावजु।
पोसतावान दाहड़ु
पोरबु मुसा काजे कोयु, इना सातवा मोहनान दोसवे दाहड़े पोसतावान दाहड़ु छे। हुयो तुमरे जुगु चुखला तिहवारोन टेम होयसे। तेने दाहड़े तुमु आपसाक उपास राखिन दुख आपजु आरू पोरबुक आगठान बादा चोड़ावजु। तुमु इने दाहड़े काहने वी भातिन काम झुनी कोरता; काहकि यु योहोवा परमेश्वर ओगोव तुमरा पोसतावु कोरने जुगु पोसतावान दाहड़ु छे। जु मानुस इना दाहड़े आपसाक उपार राखिन दुख नी देय, चु आपसा मानसो मा नास कोर देयो जासे। जे मानुस इने दाहड़े काहने वी भातिन काम कोरसे, तेना मानुस काजे हांव मानसोन इचमा गोथु मिटाय नाखीस। तुमु काहने वी भातिन कामु झुनी कोरता। यी तुमरा आखा रोवनेन जागा मा पीढ़ी गोथा पीढ़ी लोगुन जोलोम नेम कोवायसे। चु दाहड़ु तुमरे जुगु बेस चुखलु दाहड़ु होयसे। तेने दाहड़े तुमु आपसाक उपार राखिन दुख देजु। तुमु तेने मोहनेन नोवनवे दाहड़े सान्ता गोथा दिसरे दाहड़ेन सान्तु लोगुन आरामोन दाहड़ु मानता रोवजु।
झोपाट्यान तिहवार
योहोवा मुसा काजे कोयु, तु इसराएली मानसो काजे कोव: इना मोहनान पोन्दरोवे दाहड़े गोथा सात दाहड़ा लोगुन पोरबु जुगु झोपाट्यान तिहवार वावजु। पेहले दाहड़े चुखली मिटिंग रोवे। उना दाहड़े तुमु काहने वी भातिन मेहनोतोन काम झुन कोरता। तुमु सात दाहड़ा लोगुन पोरबु काजे आगठान बादा चोड़ावजु। आठवे दाहड़े चुखली मिटिंग राखजु, आरू पोरबु काजे आगठान बादा चोड़ावजु। यी खास मिटिंग छे। एने तेने दाहड़े तुमु काहने वी भातिन काठलो काम झुन कोरता।
यो पोरबुन टाकलु तिहवार छे, जेरेम चुखली मिटिंग राखनेन खोबोर कोरजु। यु तिहवार पोरबु काजे आगठा मा बादा चोड़ावने, आगठान बादा, ओनोन बादा, ढुरोन बादा आरू पेय बादा हेरा टाकला दाहड़ा पोर चोड़ावने जुगु छे। यो आखा गोथो जादा योहोवान आरामोन दाहड़ा काजे मानु, आरू आखी भेट, मानता आरू मोरजी से चोड़ावली बादाक छुड़ीन दिसरो छे, जो तुमु पोरबु काजे चोड़ाया कोरजु।
सातवे मोहनेन पोन्दरोवे दाहड़े, जोत्यार तुमु खेतोन मेर एकठी कोरसु तोत्यार पोरबु जुगु सात दाहड़ा लोगुन तिहवार वावजु। पेहले दाहड़े बेसकु चुखलु दाहड़ु होयसे; आठवु दाहड़ु वी बेस चुखलु दाहड़ु होयसे। पेहले दाहड़े तुमु वारू सी वारू झाड़ोन फोव, खजूरन झाड़ोन डाळ्या, पान्टा वावा झाड़ोन डाळ्या आरू खुदरा मायीन दोंळान डाळ्या लिन आपना पोरबु परमेश्वर ओगोव सात दाहड़ा लोगु खुस रोवजु। तुमु विरसि सात दाहड़ा लोगुन पोरबु जुगु तेनी जातरान तिहवार वावजु। यी तुमरी पीढ़ी गोथी पीढ़ी लोगुन जोलोम रिती कोवाये। तुमु तिहवार काजे सातवे मोहने वावजु। तुमु सात दाहड़ा लोगुन छोपाट्या मा रोवजु, एसराएलोन आखा गांवल्या झोपाट्या मा रोवजु, जेरेसी तुमरी पीढ़ी-पीढ़ी काजे फोम रोवे कि जोत्यार हांव इसराएली मानसो काजे मिसर मुलुक गोथु खोयड़े निकावळु तोत्यार हेनुक झोपट्या मा आसरू आपलु। हांव तुमरू परमेश्वर योहोवा छे।
ओस कोरीन मुसा इसराएली मानसो काजे पोरबुन टाकला तिहवार देखाड़्यु। आरू मुसा इसराएली मानसो काजे यहोवा भोगवानोन तिहवारोन टेम कोवीन सोमवाड़्यु
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.