परमेश्वरन सत्य वचन
लैव्यव्यवस्था नी किताब 20
हुकुम सजा टाळनेन सजा
पछु योहोवा मूसा सी कयो, इस्राएलिया सी कया कि इस्राएलियाक विच मा रयनेवाळा परदेशिया मा सी, एकदो काह नी होसे जी आपनी एकदी सन्तान मोलेक1 बलिदान करे, चो नक्कि माराय जासे; आरू जनता उका पर पथराव करे। हाव भी उका मानसक विरूद्ध होईन ओकाक उका लोगहन मा सी ओका कारण खतम करसु कि ओको आपनी सन्तान मोलेकक आपीन मार पवित्रस्थानक अशुद्ध कर्या, आरू मार पवित्र नावक विटुळ ठरायो। आरू कदाम एकदो आपनी सन्तान मोलेक बलिदान करे, आरू जनता ओकान विषय मा आनाकानी करे आरू ओकाह मार नी न्हाख्ये, तव ते हाव खुद ओका मानसक आरू ओकान घरानाक विरूद्ध होईन ओकान आरू जोतरा ओकान पछव होईन मोलेक साथ व्यभिचार करे उना सभाक भी उनाक लोगहनक वीच मा सी खतम करसु।
पछा जु प्राणी ओझाओ या भूतसाधनेवाळाक तरफ फिरीन, आरू उनाक पछव होईन व्यभिचारी बन्या, ते हाव प्राणीक विरूद्ध होईन ओकाक ओकान लोगहनक विच मा सी खतम कर दिस। एरकरता तुमु आपने आपसु पवित्र करू; आरू पवित्र बवना रयु; काहकी हाव तुमरू परमेश्वर योहोवा छे। आरू तुमु मार विधियाक मानजु, आरू ओकान पालन भी करनु; काहकी हाव तुमरो पवित्र करनेवाळो योहोवा छे। एकदो काह नी होसे जु आपना बासक या आयाक शाप आपे तिनाक नक्कि मार न्हाखे जासे; ओको आपना बासक या आयाक शाप देदा छे, ओका कारण ओकान खून ओका मुनका पर पड़से।
पछा कदाम एकदो पराई बायरक साथे व्यभिचार करे, ते जोतरी एकदी दिसरी बायरक साथे व्यभिचार करे होसे ते चो व्यभिवारी आरू ची व्यभिचारणी दुयु नक्कि मार न्हाखे जासे। कदाम एकदो आपनी सौतली आईस पुठी सुवे, चो आपना बासक डिल उघाड़नेवाळो ठरसे; एरकरता चा दुयु नक्कि मार न्हाखे जासे, ओकान लूहुय हेका मुनका पर पड़से। कदाम एकदो आपनी पतोहूक साथे सुवे, ते चा दुयु नक्कि मार न्हाखे जासे; काहकी चा उलटो काम करनेवाळा ठरसे, आरू ओकान लूहुय हेका मुनका पर पड़से। कदाम एकदो जेकी रीति बायर सी उनी रीति मानुस सी प्रसंग करे, ते चा दुयु घिनौनो काम करनेवाळा हुयसे; ओका कारण चा नक्कि मार न्हाखे जासे, ओकान लूहुय हेका मुनका पर पड़से। कदाम एकदो आपनी लाड़ीक आरू आपनी सासुक दुयुक राखे, ते यो महापाप छे; एरकरता चो मानुस आरू ची बायर तीनुन तीनुक आग्ठा मा धोपाड़े जासे, जेकी तुमरे वीचमा महापाप नी होसे। पछा कदाम एकदो मानुस पशुगामी होसे, ते मानुस आरू पशु दुयु नक्कि मार न्हाखे जासे। कदाम एकदी बायर पशुक जु जाईन ओकान संग कुकर्म करे, ते तू ओकी बायर आरू पशु दुयोक घात करनु; चा नक्कि मार न्हाखे, ओकान लूहुय हेका मुनका पर पड़से।
कदाम एकदो आपनी सौतली बोहनीसक, चाहे ओकान सगी बोहनी होसे चाहे सौतली, ओकीम बिना छिंदराक डिल देखे, ते यो निन्दित वात छे, चा दुयु आपना जातीन भाईसक डुवान सामने खतम करे जासे; काहकी जु आपनी बोहनीस डिल उघाड़नेवाळा ठरसे ओकाह आपना अधर्मन भार खुद उठावनु पड़से। पछा कदाम एकदो मानुस काहना ऋतुमती बायरक संग सुवीन ओकान तन उघाड़े, ते चो मानुस ओकान रूधिरक सोतेक उघाड़नेवाळा ठरसे, आरू ची बायर रूधिरक सोतेक उघाड़नेवाळा ठरसे; ओका कारण चा दुयु आपना लोगहनक वीच मा सी खतम कर्या जासे। आपनी जीजी या फुईक डिल नी उघाड़नु, काहकी जु ओका उघाड़े चु आपने साथे कुटुम्बिनीक नगो करता छे; एरकरता उना दुयुक आपना अधर्मन भार उठावनु पड़से। कदाम एकदो आपनी काकीन साथे सुवे, ते चो आपना काकान डिल उघाड़नेवाळो ठरसे; एरकरता चा दुयु आपना पापक भार क उठावीन निर्वश मर जासे। कदाम एकदो आपनी वोवड़ीस या भयाहू क आपनी लाड़ी बनावे, ते ओका घिनौनो काम जाननु; आरू आपना भाईसक डिल उघाड़नेवाळा ठरसे, ओका करण चा दुयु निर्वश रवसे।
तुमु मारी सब विधिया आरू मारा सब नियमोक समझक साथे माननु; जेका सी यो नी होसे कि जेका देश मा हाव तुमुक लीन जाय रयु छे चु तुमुक उगल देसे। आरू जेकी जातीन लोगहनक हाव तुमरे ओगव सी निकाळता छे उकान रीति रस्म पर नी चालनु; काहकी उना लोगहन नी जो यो सब कुकर्म करे छे ओका कारण मखे उना सी घृणा होय गई छे। पुन हाव तुमु लोगहन सी कयतु छे कि तुमु ते ओकान धरतीन आधिकारी होसे, आरू हाव ओका देश क जेका मा दूध आरू मोवन धारा वोहयता छे तुमरा हक मा कर दिस; हाव तुमरो परमेश्वर योहोवा छे जु तुमुक दिसरा देशक लोगहन सी अलग कर्यो छे। ओका कारण तुमु शुद्ध आरू अशुद्ध पशु मा, आरू शुद्ध आरू अशुद्ध चिल्ला मा भेद करनु; आरू एकदो पशु या चिल्लो या काहनो प्रकारन धरती पर रेंगनेवाळा जीवजन्तु काह नी होसे, जेका हाव तुमरे करता अशुद्ध ठरावीन वर्जित कर्या छे, ओका सी आपने आप क अशुद्ध नी करनु। तुमु मार करता पवित्र बवना रयु; काहकी हाव योहोवा खुद पवित्र छे, आरू हाव तुमु क आरू देशक लोगहन सी एरकरता अलग कर्या छे कि तुमु निरन्तर माराज बवना रवु।
कदाम एकदो मानुस या बायर ओझाई अथवा भूतज साधना करे, ते चो नक्कि मार न्हाखे जासे; ओसा पर पथराव कर्या जासे, ओकान लूहुय हेकाक मुनका पर पड़से।
Source notes (1)
- Footnote मोलेक कनानी लोगहन न लारे पुजने वाळो देव
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.