परमेश्वरन सत्य वचन
लैव्यव्यवस्था नी किताब 10
नादाब आरू अबीहू क पाप
तव नादाब आरू अबीहु नावन हारून क दुय पोर्या आपना आपना धूपदान लिदा, आरू उनामा आगठो भर्या, आरू हेका मा धूप न्हाखिन हेको ऊपर वाळी आग्ठी यहोवाक अर्पित करीया जेको हुकुम यहोवा आप लोन हुतो। तव योहोवा क सामने आगठो निकळे आरू उना दुयोक भस्म कर देदो, आरू चा योहोवा क सामने मर गोया। तव मूसु हारून सी कयो, “यी वात छे जेका योहोवा कयो हतो कि जो मार सामने आवे, नक्की छे कि चो मखे चुखलो जाने, आरू सब लोगहन क सामने म्हारी महिमा करे।” आरू हारून चुप रयो।
तव मूसा हारूनन काका उज्जीएल न पोर्या, मीशाएल आरू एलसाफान क बुलायो। त्यो हेनको कयो, साते आवो, आरू तुमरा भतेरजास क चुखला जागान सामने सी हाकलीन पड़ावन बाहर ली जावो। मूसा क उकाह हुकुम क अनसारे चा नाट जाईन उनाक चौगलान सात मा हाकलीन पड़ावन बाहर ली गिया। तव मूसु हारून सी आरू ओकान पोर्या एलीआजार आरू ईतामार सी कयो, “तुमु लोगहन आपना मुनका झोठा मा वेरू, आरू मा आपना छिंदरा क फाडु, ओसो नी होय कि तुमु भी मर जावु, आरू इस्राएल क कुल घराना क लोगहन जा तुमरे भाईबन्धु छे योहोवान क लागाड़ली आग्ठी सी मर गिया हेनू पर विखाम रड़े। आरू तुमु लोगहन मिलापवाळा तम्बू क झोपला क बाहरते नी जानु, ओसो नी होय कि तुमु मर जावु; काहकी योहोवा ख अभिषेक क तेल तुमु पर लागाड्या छे।” मूसा क ओका वचन क अनसारे हेका कर्या।
याजक क करता नियम
ओळतेन योहोवा हारून सी कयो, “जव जव तू या तारा पोर्या मिलापवाळा तम्बू मा आया तव तव तुमरे मा रयीन कोय बी मोंद आरू नी काहला भातिन क शराब, के ओसो नी होय कि तुमु मर जावु; तुमरी पीढ़ी मा यी विधि चालती रये, जेका सी तुमु चुखला आरू विटुळ मा, आरू वारला आरू भुंडला न पारक कर सके, आरू इस्राएलिया क उना सब विधिया क सिखाड़ सके जेका योहोवा मूसा क द्वारा उनाक देखाड़लो छे”
ओळतेन मूसु हारून सी आरू ओकान वाचला दुयु पोर्या ईतामार आरू एलीआजार सी भी कयो, “योहोवा क हव्य मा सी जो अन्नबलि वाचला छे उका लीन वेदी क जु बिना खमीर खाऊ, काहकी चो घण चुखी छे; आरू तुमु उका काहना पवित्रजागा मा खाऊ, चा योहोवा क हव्य मा सी तारो आरू तारा पोर्या क हक छे; काहकी हाव ओसोज हुकुम जोडी छे। पुन हिलाई ओसली भेट क छाती आरू उठावळी ओसी भेट क जाँघ क तुमु लोगहन, मतलब तू आरू तारा पोर्या-पोराय क सब काहनी शुद्ध जागा मा खाऊल काहकी चा इस्राएलिया क मेलबलि मा सी तुखे आरू तारा बच्चा क हक ठराव देदी गई छे। चरबा क हव्या समेत जी उठाई ओसी जाँग आरू हिलाई होई छाती योहोवा क सामने हिलाने क करता आव्या करसे, या भाग योहोवा क हुकुम क अनसारे हमेशा विधि क व्यवस्था सी तार जु बच्चा क करता छे।”
ओळतेन मूसु पापबलि क बुकड़ा क खोजबीन कर्या, ते काय जोड्यो कि चो धोपाड्यो गोयो छे। एरकरता एलीआजार आरू ईतामार जु हारून क पोर्यो वाचला हता उना सी चा रीस मा आवीन कयने लाग्या, पापबलि जो घण चुखी छे आरू जेका योहोवा तुमुक एरकरता देदा छे कि तुमु मण्डली क ओधोरोम क भार आपसु उठावीन उनाक करता योहोवा क सामने पश्चाताप करे, तुमु ओकान मांस चुखलोजागा मा काह नी खादो? देखु, ओकान लुहूय चुखलोजागा क माहयता ते लाव्या नी गोया, पाक्को यो वारलो हुयतो कि तुमु मारा हुकुम क अनसारे ओकान मांस क चुखलाजागा मा खादा।? ओका जवाब हारून मूसा क ओका प्रकार देख्या, देख, आजुज हेका आपना पापबलि आरू होमबलि क योहोवा क सामने चढ़ाया; ओळतेन मखे पर ओसो गोरा आय पड़यो छे! एरकरता कदाम हाव आज पापबलि क मांस खाता ते काय ती वात योहोवा क सामने वारलो रवतो? जव मूसु यो सोमव्यु तव उका संतुष्ट होयु।
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.