परमेश्वरन सत्य वचन
योहोसु 3
इसराएली लोगहन क यरदन पार करनु
योहोसु सोंदारे उठ्यु आरु सब इसराएली लोगहन क साथ मा लीन शित्तीम सी चालीन यरदन नदीन धड़े आया; आरु चा पार उतरने सी पेहल चाज टिक गया। आरु तीन दाहड़ा क बाद अगळवानीया छावनीक वीच मा जाईन प्रजा क लोगहन क या आदेश देदु, “जव तुमु क आपनु योहोवा परमेश्वरन वाचान सन्दुक आरु हेको हाकलीन लेवीया याजक भी देख पड़े, तव आपना जागा सी चालता चालता उकान पछव पछव चाल्या, पुन उकान आरु तुमरे वीच मा दुय हजार हाथन लगभग जागु रयु; तुमु सन्दुक नाट नी जानु। काहकी तुमु देख सकु कि काहनी वाट सी तुमुक चालनु छे, काहकी हिमी तक तुमु ओका वाट पर होईन नी चाल्या।” पछु योहोसु प्रजाक लोगहन सी कयो, “तुमु आपने आप क पवित्र कर्या; काहकी कालेन दाहड़े योहोवा भगवान तुमरे वीच मा विछेळीयो काम करसे।” तव योहोसु पुजारान सी कयो, “वाचा क सन्दुक उठावीन इसराएली लोगहन क ओगळ ओगळ चालु।” तव त्या वाचान सन्दुक हाकलीन लोगहन क ओगव ओगव चालीया।
तव भगवान योहोसु सी कयो, आजुन दाहड़े रईन हाव इसराएलीया क सामने तारी बढ़ाई करने सुरवात करीस, जेका सी त्या जान लेय कि जोसो हाव मुसा क साथे रयतु हतु तोसोज हाव तार सात मा भी रइस। आरु तु वाचान सन्दुक क हाकलने वाळा पुजारान क यो हुकुम दे, “जव तुमु यरदन क पानीन धोड़े पुग्या, तव यरदन मा उबा रयना।”
तव योहोसु इसराएलीया सी कयो, “साथे आवीन आपना योहोवा परमेश्वर क वचन सोमळो।” आरु योहोसु कयने लाग्यु, “ओका सी तुमु जान लेसे कि जीवता परमेश्वर तुमरे माहय मा छे, आरु चा तुमरे सामने सी नि:सन्देह कनानियो, हित्तियो, हिब्बीया, परिज्जियो, गिर्गाशियो, एमोरियो, आरु यबुसियो क उकान देश मा सी निकाळ देसे। सोमवु, पृथ्वी भरीन पोरबु क वाचा क सन्दुक तुमरे ओगव ओगव यरदन मा जाने पर छे। एरकरता हिमी इसराएलीया क गोत्रो मा सी बाहरते मानसे निवाळ लेवु, चा एक गोत्रो मा सी एक मानुस होय। आरु जीन टेमे धरती भरीन पोरबु योहोवा क वाचा उठावने वाळा याजक क पाय यरदन क पाणी मा पड़से, उका टेमे यरदन क ऊपर सी वहयतो पाणी उभरय जासे, आरु ढेर होईन उबो रयसे।”
एरकरता जब प्रजा क लोगहन आपना पड़ाव सी यरदन पार जाने क चाल पड़्या, आरु याजक वाचा क सन्दुक उठावतु प्रजान ओगव ओगव चाले, आरु सन्दुक उठावने वाळा यरदन पर पुग्या, आरु सन्दुक क उठावने वाळा याजक क पाये यरदन तीर क पाणी मा डुब गया (यरदन क पानीन ते कटनी क टेमे सब दाहड़ा आपना किनारा पर वयतो रयतो छे), वईन आवतो हतो चा बैस दुर, मतलब आदाम नगर क नाट जो सारतान सोहोर क नाट छे उबो रईन एक ढेर होय गयो, आरु भिताड़ा पर सा उबो रयो, आरु जो पाणी अराबा क दरियो जो खारो दरियो भी कयाड़तो छे, उकान तरफ वयतो जातो हतो, चो पुरी रीति सी सुख गयो; आरु प्रजा क लोगहन योरीहो क सामने पार उतर गया। आरु याजक योहोवा भगवान क वाचा सन्दुक धरीन यरदन क एकदम वीच मा पुगीन स्थल पर स्थिर उबा रया, आरु सब इसराएलीया चालीन स्थल पार उतरता रया, आखरी मा उका सब जाति क लोग यरदन पार होय गया।
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.