योहोसु 17

पश्चिम मा मनश्शेक भाग

1पछु युसुफक जेठे मनश्शेक गोत्रक भाग चिट्ठी न्हाखने सी यो ठरे। मनश्शेक जेठाक पोर्‌यो, गिलादक बास माकीर, योद्धा हतो ओका कारण ओकान ओवलियादक गिलाद आरु बासान जोड्यो। 2एरकरता यो भाग दिसरा मनश्शेइयाक करता ओकान कुलक अनसारे ठर्‍यो, मतलब अबीएजेर, हेलेक, ओसरीयेल, शेकेम, हेपेर, आरु शमीदा; जु आपना आपना कुलक अनसारे युसुफक पोर्‌यो मनश्शेक ओवलियाद माहयला मानसे हता, उनाक अलग अलग ओवलियादक करता ठर्‍या। 3पुन हेपेर जु गिलादक पोर्‌यो, माकीर क नातन्यो, आरु मनश्शेक नातु पंतु हतु, ओकान पोर्‌यो सलोफादक पोर्‌यो नी हता, पोरायुज होई; आरु ओकान नाव महला, नोआ, होग्ला, मिल्का, आरु तिर्सा छे। 41 तव चा एलीयाजर याजक, नुनक पोर्‍यु योहोसु, आरु प्रधानक जु जाईन कयने लागी, “योहोवा मुसाक हुकुम देदो, कि चु आमुक आमराक भाइसक वीच मा वाट दे।” ते योहोसु योहोवा क हुकुमोन अनसारे हेके उनाक चचाओक वीच मा वाटो जोड्यो। 5तव मनश्शेक, यरदन पार गिलाद देश आरु बासानक छुड़, दस भाग जोड्या: 6काहकी मनश्शेइयाक वीच मा मनश्शेई बायराक भी वाटु जोड्यो। आरु दिसरा मनश्शेईयाक गिलाद मा जोड़्‌या

7मनश्शेक सीमा आशेर सी लीन मिकमतात तक पुगी, जो शकेमक सामने छे; पछु चु दक्षिणक तरफ जाईन एनतप्पुहक निवासिया तक पुग्या। 8तप्पुह न जागा ते मनश्शेक जड्यो, पुन तप्पुह नगर ज्यो मनश्शे न सीमा पर रयता हुता चु एपरेमियान हुयो। 9त्या वाळी सीमा कानाक नाले तक उतरीन ओकान दोखेवरे तरफ तक पुग गयी; यो नगर यद्यपि मनश्शेक नगरक वीच मा हतो तेभी एपरेमक ठरे; आरु मनश्शेक सीमा ओका नालाक उत्तरक तरफ सी जाईन दरिया पर निकळी; 10दोखेवरे क तरफलो देश ते एपरेमक तरफ उत्तरक तरफक मनश्शेक जोड्यो, आरु ओकान सीमा दरियो ठर्‍यो; आरु चा उत्तरक तरफ आशेर सी आरु पुर्वक तरफ इस्साकार सी जाय भेवाया। 11आरु मनश्शेक, इस्साकार आरु आशेर आपना आपना नगरक समेत बेतशान, यिबलाम, आरु आपना नगरो समेत दोरक निवासी, आरु आपना नगरक समेय तानाक निवासी, आरु आपना नगर समेत मगिद्दोक निवासी, या तीनु जा ऊचा जागा पर बठला जोडया। 12पुन मनश्शे उना नगरक निवासियाक उनामा सी नी निकाळ सके; एरकरता चा कनानी उका देश मा बलपुर्वक बठला रया। 13तेभी जव इसराएली सामर्थी होय गया, तव कनानिया सी बेगारी ते करने लाग्या, पुन उनाक पुरी रीति सी बाहरते निकाळ नी सक्या।

एपरेम आरु मनश्शे गोत्राक द्वारा जास्ती धरतीक मांग

14युसुफक सन्तान योहोसु सी कयने लागी, “आमु ते गिनती मा बैस छे, काहकी हिमी तक योहोवा आमुक बरकत आपतो आयो छे, पछु तु ते आमरा भागन करता चिट्ठी न्हाखिन काह एक अंश देदा छे?” 15योहोसु उनाक कयो, “कदाम तुमु गिनती मा बैस होए, आरु एपरेमक बोयड़ा देश मा तुमरे करता नानो होय, जा परिज्जिया आरु रपायान देश जु जंगल छे ओकामा जाईन झाड़काक काट न्हाखु।” 16युसुफक सन्तान कयो, “चा बोयड़ा वाळो देश आमरे करता नानो छे; आरु बेतशान आरु ओकान नगर मा रयनेवाळा, आरु यिज्रेलक तराई मा रयनेवाळा, जोतरा कनानी नेड़ला देश मा रयता छे, उना सभाक जु लोहान रथ छे।” 17पछु योहोसु, काय एपरेम काय मनश्शेई, मतलब युसुफ क सब घराना सी कयो, “होव, तुमु लोगहन ते गिनती मा बैस होसे, आरु तुमरी ताकोत भी मोटली छे, एरकरता तुमुक केवल एकुज भाग नी जोड़से; 18बोयाड़ा वाळो देश भी तुमरो होय जासे; काहकी चु जंगल ते छे, पुन ओकन झाड़का काट न्हाख्या, तव ओकान आस पासक देश भी तुमरो होय जासे; काहकी चाहे कनानी सामर्थी होसे, आरु उनाक जु लोहान रथ भी होसे, तेभी तुमु हेकाक चा रईन निकाळ सकजे।”