परमेश्वरन सत्य वचन
योहोसु 14
यरदनक पश्चिमी भागन बटवारा
जु जु भाग इसराएलीया कनान देश मा जोड्या, जिनाक एलीयाजर याजक, आरु नुनक पोर्यो योहोसु, आरु इसराएली गोत्राक डाहला घरानान मुखी मुखी मानसे उनाक देदा चा या छे। 1जी हुकुम योहोवा मुसाक द्वारा साढ़े नोव गोत्राक करता आपी हती, ओकान अनसारे ओकान भाग चिट्ठी न्हाख न्हाखिन आप गयो। मुसु ते अड़ीच गोत्रान भाग यरदन पार आप्या हता; पुन लेवियाक ओको उनाक वीचमा काहनो भाग नी आप्यो हतो। 2युसुफक ओवलियाद क ते दुय गोत्रा होय गया हता, मतलब मनश्शे आरु एपरेम; आरु ओको देश मा लेवियाक थुड़ोक भाग नी आप्या, केवल रयनेवाळ नगर, आरु पशु आदि धन राखनेक चाराई ओकोक जोड़ी। जी हुकुम योहोवा मुसाक आपी हती ओकान अनसारे इसराएलीया कर्या; आरु हेका देशक वाट लेदा।
हेब्रोन नगर कालेबक आप्यो गयो
तव यहुदी योहोसुक जु गिलगाल मा आया; आरु कनजी यपुन्नेक पोर्यो कनिज्जी कालेब ओकाह कयो, “तु जानतु होसे कि योहोवा कादेशबर्ने मा परमेश्वरक जन मुसा सी मार आरु तार बारामा काय कया हता। 4जव योहोवाक दास मुसु मखे ओका देशक भेद लेनेक करता कादेशबर्ने सी मोकल्यो हतो तव हाव चालीस सालन हतो; आरु हाव सच्चा मन सी ओका जु खबर ली आयो। आरु मार साथी जा मार साथे गया हता हेका ते प्रजाक लोगहन मन नाराज कर देदा, पुन हाव आपना परमेश्वरक पुरी रीति सी वात मानी। 5 तव उके दाहड़े मुसु शपथ खाईन मखे सी कयो, ‘तु ते पुरी रीति सी मार परमेश्वर योहोवान वातक अनुकरण कर्या छे, ओका कारण बिनदास जीन धरती पर तु आपना पाय धरीन आया छे चो हमेशान करता तारो आरु तार ओवलियादक भाग होसे।’ आरु हिमी देख, जव योहोवा मुसा सी यो वचन कया हता तव सी पोयतालीस साल होय चुक्या छे, जिनामा इसराएली जंगल मा घूमता फिरता रया; ओकामा योहोवा आपने कयनेक अनसारे मखे जीविता राख्या छे; आरु हिमी पचास सालन छे। जोतरी ताकद मुसाक मुकलनेन दाहड़े मखे मा हतो तोतरी ताकद हिमी तक मखे मा छे; युद्ध करने, या माहयता बाहरता आवने जानेक करता जोतरी ओके टेमे मखे मा ताकोत हती ओतरी हिमी भी मखे मा सामर्थ्य छे। एरकरता हिमी ची पहाड़ी मखे आप दे जेरी चर्चा योहोवा भगवान उके दाहड़े करी हती; तु ते ओके दाहड़े सोमव्यु होसे कि ओकामा अनाक ओवलियाद रयता छे, आरु मोटला मोटला गढ़वाळा नगर भी छे, पुन काय जाने संभव छे कि योहोवा मार साथे रवे, आरु ओकान कयनेक अनसारे हाव हेका उनाक देश सी निकाळ दिस।”
तव योहोसु ओकाह बरकत देदा; आरु हेब्रोनक यपुन्नेक पोर्या कालेबक भाग कर देदा। ओका कारण हेब्रोन कनजी यपुन्नेक पोर्या कालेबक भाग आज तक बवनो छे, काहकी चो इस्राएलक परमेश्वर योहोवाक पुरी रीति सी अनुगामी हता। पेहले हेब्रोनक नाव किरयतरबा हतो; चो अर्बा अनाकियो मा सब सी मोटलो मानुस हतो। आरु उका देशक लड़ाई सी शान्ति जोड़ी।
Source notes (5)
- Cross-reference गिनती 26:52-56; 34:13
- Cross-reference गिनती 32:33; 34:14-15; व्यवस्थाविवरण 3:12
- Cross-reference गिनती 14:30
- Cross-reference गिनती 13:1-30
- Cross-reference गिनती 14:24
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.