योना 4

योनान रीस आरु परमेश्वरन दया

1यी वात योना काजे बेसकी भुंडी लागी आरु हेरी रिस भोड़की। 2योना योहोवा काजे ओसु कोविन विनता कोर्‌यु, “ए योहोवा, जोत्यार हांव आपसा मुलुकोम होतु, तोत्यार काय हांव यी वात नी कोवतु होतु? ओतरान कोरता हांव तारो हुकुम सोमोवतात् तोरसीस ढास जाने कोरीन उतवाव कोर्‌यु; काहकि हांव जानतु होतु कि तु बेस गिनाकु आरु मोंगावु परमेश्वर छे, आरु विगुर वार लागाड़े रिस कोरने वावु गिनो सी भोरायलु छे, आरु दुख आपने सी खुस नी होये।” 3ओतरान कोरता हेमी ऐ योहोवा, मारु जीव ली ले; काहकि मारे जुगु जिवतेलो रोवने गोथो मोरनो वारु छे। 4यहोवा कोयु “तारी जी रीस भोड़की रोय, काय ची वारु छे? 5ओतरा पोर योना तेना सोहोर गोथु निकविन, तेरे उगेवने भेनी बोठ गोयु; आरु चां एक खोपड़ो बोनावीन तेरा साहवाम बोसीन यो देखने लाग्यु कि सोहरोन काय होयसे?” 6“तोत्यार योहोवा परमेश्वर एक ओन्डान झाड़ उगाड़ीन ओसु वोदाड़्यु कि योनान मुनका पोर साहवु होये, जेरेसी हेनाक साहवु जोड़े। योना तिना ओन्डान झाड़ोन कोरता बेसकु खुश होयु।” 7सोंदारे जोत्यार वेगु दाहड़ु उगतात् परमेश्वर एक किड़ा काजे मुकल्यु, जु ओन्डान झाड़काक ओसु चायु कि चु सुक गोयो। 8जोत्यार दाहड़ु उग्यु, तोत्यार परमेश्वर उगेनली वाहवी चालाड़ीन तोप पाड़्यु, आरु तोप योनान मुनका पोर ओसी लागी कि हुयो लेवायने लाग्यो; आरु होयु यो कोविन मोत माँग्यु, “मारे जुगु जिवतेलो रोवने सी मोरनोत् वारु छे।” 9परमेश्वर योना काजे कोयु, “तारी रीस, जी ओन्डान झाड़ोन कोरता भोड़की रोय, काय होयी रीस वारु छे?” योना कोयु, “हाव, वारुत् छे। रीसोन कोरता मारु जीव वी जात रोवे, ती वी वारलो छे।” 10तोत्यार योहोवा कोयु, “जिना ओन्डान झाड़ोक तु काहिन मेहनोत नी कोर्‌यु, नी तिनाक वोदाड़्यु, जो एकुत् रातोम उग गोयो, आरु एकुत् रातोम नास वी होयो; तिनान करता तु काहय को दुखी छे।” 11ओवी यो मोटलो सोहोर नीनवे जेरेम एक लाख वीस होजार गोथा जादा मानसे छे जे आपसा जेवड़ा डाखरिया हातोन सातायली वातोक नी उवखे आरु बेसका घोरोन ढुरे वी चां रोवे, ती काय हांव तिन्दरे पोर गीन नी कोरो?