याकूब 3

जीभ क वश मा करने

1हे मारा भाईस, आरू बहनीस तुमू मा छे घोणा शिक्षक नी बने, काहकि जानता होय कि हामु शिक्षक आरू भी दोषी ठेरायछे। 2अतरान करीन कि हामु सब घोणा कावा चूक जानता छे; जो काही वचन मा नी चूकता चो तो सिध्द मानुस छे आरू सारी देह पर भी लगाम लागाड़ सकता छे। 3जव हामु आपसा वश मा करने क करता घुल्लान मुय मा लगाम लागाड़जे ती हामु ओका सब डील क फेरवी सकजे। 4देखु ढोंड्या भी, यदि ओसो मोटो होयतो छे आरू बैस हवा छे चालाड़ जातो छे, तवभी एक नानी सी पतवार क द्वारा मांझी की मरजी क लारे घुमायो जाए।

5वोसो ही जीभ एक नानो सा डील छे आरू वो मोटी मोटी डीगे मारती छे। देखु, थुड़ी सी आगठी छे कोतरा मोटा जोन्गोल मा आगठो लाग जातो छे। 6जीभ भी एक आगठो छे; जीभ हामरे डील मा अन्याय क एक मानसे छे, आरू सारी देह पर गुणो लागाड़ ती छे, आरू जीवन गती मा आगठो लागाड़ देती छे, आरू नरक कुण्डा की आगठा छे धपती रयती छे। 7काहकि हर प्रकार क वन मा वाळा जनवार चिल्ला, आरू रेंगनेवावा जन्तु, आरू जलचर तो मानुस जाति क वश मा होय सकता छे आरू होय भी गया छे। 8पुन जीभ क मानुस मा छे काही वश मा नी कर सकता; वो एक ओसी बला छे जो कदी रूकती ही नी, वो जीव नाशक विष छे भरी होयी छे। 9इनी मा रयन छे हामु पोरबु आरू बास की बढ़ाई करता छे, आरू इनी छे मानुस क जो यहोवा–भगवान क स्वरूप मा पैदा होया छे शाप देता छे। 10एक ही मुय छे धन्यवाद आरू शाप दुयू निकवता छे। हे मारा भाईस ओसो नी होयनो जूवे। 11काय सुवता क एक ही मुय छे गुव्वो आरू खारलो पानी दुयू निकवता छे। 12हे मारा भाईस, काय अंजीर क झाड़का मा जैतुन या अंगुर क रस की सोता मा अंजीर लाग सकता छे? वोसो ही खारे सुवता छे गुव्वो पानी नी निकव सकतो।

सोरगन बुध्दि

13तुमू मा बुध्दिवान आरू समझदार कुन छे? जो ओसो होय वो आपसा काम क वारली चाल–चलन छे ओको नम्रता सहित प्रगट करे जो ज्ञान छे पैदा होयती छे। 14पुन जेतार तुमू आपसा–आपसा मन मा कड़वी किचवाय आरू विरोध राखता होय, तो सच्चाई क विरोध मा डाहळाय नी करने आरू, नी तो झूठ बुलने। 15यो ज्ञान वो नी जो ऊपर छे उतरता छे, वरना सांसारिक, आरू डीलन अनसारे, आरू शैतान सी आवे। 16काहकि वा किचवाय आरू विरोध हुयसे छे, वाँ बखेड़ा आरू हर प्रकार क दुष्कर्म भी हुयसे छे। 17पुन जो ज्ञान ऊपर छे आवतो छे वो पेहल तो चुखलो होयतो छे पछु मिलनसार, कोमल आरू मृदुभाव आरू दया वारलो फोव छे लदा होया आरू भेदभाव आरू कपट रहित हुयसे छे। 18मिलाप करावनेवाळा न्यायपन क फोव मेलमिलाप क साथे वेरता छे।