परमेश्वरन सत्य वचन
इब्रानियों 7
मेलख़ीत्सेदेक पुजारा
यो मेलख़ीत्सेदेक शालेम क राजा, आरू परमप्रधान यहोवा–भगवान क पुजारा, सर्वदा पुजारा बनाय रयता छे। जव अब्राहम राजा क मारीन पुगीयो जाता हुता, तो इनी ने ओका सी भेंट करीन ओको बरकत दिदो। इनी क अब्राहम ने सब चीज क दसवा अंश भी दिदा। यो पेहल आपने नाव क मतलब लारे, न्यायपन क राजा, आरू पछु शालेम मतलब शांती क राजा छे। जेरो नी बास, नी आश, नी वंशावड़ी छे, जेरा दाहड़ा क नी शुरू छे आरू नी जीवन क आखरी छे; पुन यहोवा–भगवान क पोर्य क स्वरूप ठराय कर वो सदा क करता पुजारा बनाय रयता छे।
हिमी अतरान करीन पर ध्यान करू कि वो कोसो महान हुता जेरो कुलपति अब्राहम ने लूट क वारला छे वारला माल क दसवा अंश दिदा। लेवी की अवलियाद मा छे जो पुजारा क पद देखता छे, तीनुक हुकुम मिवी छे कि मानछे, मतलब आपसा भाईस्यो छे, जूवे अब्राहम ही की डील छे काय नी जन्हाव होय, व्यवस्था क लारे दसवा अंश लेय। पर त्योने, जो इन्दरी वंशावड़ी मा क भी नी हुता, अब्राहम छे दसवा अंश लेदो, आरू जिनाक प्रतिज्ञा मिवी होती ओको बरकत देदी। इनामा संदेह नी कि नाना मोटा छे बरकत देखता छे। आरू याहा तो मरनहार मानुस दसवा अंश लेता छे, पर वाँ चो लेता छे जिन्दरी गवाय देदी जाती छे कि वो जीवतो छे। तो हामु यो भी कय सकता छे कि लेवी ने भी, जो दसवो अंश लेता छे, अब्राहम क द्वारा दसवो अंश आपियो। काहकि जिना टेहाव मेलख़ीत्सेदेक ने ऐरा बास छे भेंट की, उना टेहाव वो आपने बास की देह मा हुता।
मेलख़ीत्सेदेक क सदृश दिसरा पुजारा
यदि लेवीय पुजारा पदन द्वारा सिध्द हासिल होय सकती ओका सहारे मानसे व्यवस्था मिवी होती तो पछु काय जरूरत होती कि दिसरा पुजारा मेलख़ीत्सेदेक की रीति पर उबा होय, आरू हारून की रीति क नी कवायसे। काहकि जव पुजारा क पद बदलाय जाता छे, तो व्यवस्था क भी बदलने पाको छे। काहकि ओका विषय मा यो वात काही जाती छे कि वो दिसरा अवळियाद क छे, जिनामा छे काही ने वेदी की सेवा नी की। तो प्रगट छे कि आमरो पोरबु यहूदा क अवळियाद मा छे उद्य हुयो छे, आरू इनीये अवळियाद क विषय मा मूसा ने पुजारा पद की काही चर्चा नी की।
आमरो दावा आरू भी स्पष्टता छे प्रगट होय जाता छे, जव मेलख़ीत्सेदेक क समान एक आरू पुजारा पैदा होय, जाता छे। जो शारीरिक हुकुमन व्यवस्थान लारे नी, पर अमरकाया जीवनन शक्ति क लारे नियुक्त हुयो होय। काहकि अतरान करीन विषय मा यो गवा देदी गयी छे, “तु मेलख़ीत्सेदेक की पर युगानयुग पुजारा छे।”
इनीये प्रकार, पेहली हुकुम निर्बल आरू निष्फल हुयने क कारण लोप होय गयी। अतरान करीन कि व्यवस्था ने काही वात की सिध्दि नी करी, आरू अतरान करीन स्थान पर एक ओसी वारू आश राखी गयी छे ओका द्वारा हामु यहोवा–भगवान क समीप जाय सकता छे। मसीहन नियुक्ति विना शपथ नी होयी। काहकि वो तो विना शपथ पुजारा ठराय गया पर यो शपथ क साथे ओकी आरू छे नियुक्ति कर्या गया ओका ओको विषय मा कयो,
“पोरबु ने शपथ खादी,
आरू वो ओका सी पछु नी पछतावो छे
कि तु युगानयुग पुजारा छे।”
इनीये प्रकार ईशु एक वारू वाचा जामिन ठेराया।
वो तो घोणा मोटी संख्या मा पुजारा बनतो आयो, ऐरो कारण यो होतो कि मरलो इनुक रोवने नी देती होती। पर यो युगानयुग रोवता छे, इनीये कारण ओको पुजारा पद अटल छे। अतरान करीन करता जो ओको द्वारा यहोवा–भगवान क साथे आवता छे, वो इन्दरो पूरा पूरा उध्दार कर सकता छे, काहकि वो ओको करता रावन्या करने क सर्वदा जीवता छे।
शेवली कावा ओसो ही पुजारा हामरे योग्य हुता जो चुखलो, आरू निष्कपट, आरू निर्मल, आरू पापी छे अलग, आरू सोरगदूत छे भी उचो कर्या होया होय। उन डाहला पुजारा क समान ओको छाची नी कि हर दाहड़े पेहल आपने पाप आरू पछु मानसे क पाप क बलिदान चढ़ाया; काहकि त्यो आपने आप बलिदान चढ़ावीन उको एक ही बार मा पूरा कर दिदा। काहकि व्यवस्था तो निर्बल मानुस क डाहला पुजारा नियुक्त करती छे, पुन ओको शपथ क वचन जो व्यवस्था क बाद खाय गयी, उना पोर्या क नियुक्त करता छे जो युगानयुग क करता सिध्द कर्या गया छे।
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.