परमेश्वरन सत्य वचन
इब्रानियों 12
यहोवा–भगवान बास द्वारा ताड़ना
इनीये कारण जव गवा क ओसो मोटो वादवो हामु क घेर होया छे, तो आवु, हर एक रूकनेवावा चीज आरू उलझानेवावा पाप क दूर करीन, वो दौवड़ीन जिनमा हामु दौवने छे धीरज छे दौवड़ने। आरू विश्वास क करता आरू सिध्द करनेवावा ईशु की आरू ताकद रये, जो ओको खुश क करता जो ओका ओगव दरिया हुता, लज्जा की काही चिंता नी करीन कुरूस क दुःख सहा, आरू यहोवा–भगवान क सिंहासन की डासच्य आरू जाईन बठ्यो।
एरकरीन ओको पर ध्यान करू, जो आपने विरोध मा पापियो क ओतरा विरोध सह लेदा कि तुमू निराश हईन साहस नी छुड़ देवु। तु ने पाप छे लड़ायतो हुयो ओका सी ओसी मुठभेड़ नी की कि तुमरी लुहूय वयो होय।
आरू तु ओको शिक्षा क, जो तु पोर्य क समान दिदा जाता छे, भूल गया होय:
“हे मारा पोर्या, पोरबु की ताड़ना क हलकी वात नी जान,
आरू जव वो तुखे घुड़के तो साहस नी छुड़।”
काहकि पोरबु जिनासे मोंग करता छे,
ओकी ताड़ना भी करता छे, आरू जिनाक पोर्य बनाय लेता छे, ओकी कोड़े भी लागता छे।
तुमू दुःख क ताड़ना समझीन सह लेवु; यहोवा–भगवान तुमू पोर्य जानीन तुमरे साथे बर्ताव करता छे। वो कुन सी पोर्य छे जेरी ताड़ना बास नी करता? यदि वो ताड़ना जिन्दरे भागी आखा हुयसे छे, तुमरी नी होयी तो तुमू पोर्या नी, पर व्यभिचार की अवलियाद ठेराये। पछु जव कि हामरे शारीरिक बास भी हामरी ताड़ना कर्या करता हुता आरू हामु इन्दरो विजुत कर्या, तो काय आत्मान बासन आरू भी हको तळे नी रये जिनाछे हामु जीवता रया। वो तो आपसी–आपसी समझ क लारे थुड़ा दाहड़ान करता ताड़ना करता हुता, पर वो तो हामरे लाभन करता छे, कि हामु भी ओकी चुखलान भागी होय जाय। वर्तमान मा हर प्रकार की ताड़ना खुशी की नी, पर शोक ही की वात देखाय पड़ती छे; तौभी जो ओको सहते सहते पक्का होय गया छे, बाद मा इनुक शांती क साथ न्यायपन हर फोव मिवता छे।
शिक्षा आरू चेतावनी
तेरे करीन ढीले हात आरू निर्बल मांडा सुधा करू। आरू आपसा पायन करता सुध मार्ग बनावु कि लेंगड़ा भटक नी जाय पर भला वारू होय जाय।
सब छे मेलमिलाप राखु, आरू ओको त्योखलोतान हेर होय ओका विना काही पोरबुन कदी नी देखछे। ध्यान छे देखता रवु, ओसो नी होय कि काही यहोवा–भगवानन फोकटन दया छे वंचित रया जाय, या काही कड़वी मुव फूटीन कष्ट देय, आरू अतरान करीन द्वारा घोणा छे मानसे विटळ होय जाय। ओसो नी होय कि काही जन व्यभिचार या एसावन समान अन्यायी होय जु एक बारम खानो बदलीन आपसा पेहलौठा होयनेन पद वेच नाख्य। तुमू जानता होय कि बाद मा जव त्यो बरकत पायो जूवी तो खरो नी गिना गया, आरू आसू पाड़ी पाड़ीन हेरने पर भी मन फिरावनेन मेखे ओको नी मिव्यो।
तुमू तो ओको बयड़ा साथे जो धर्य जाय सकता होतो, आरू आगठो छे आँधारलो आरू आंझीन साथे। आरू तुरही की ध्वनि, आरू बुलनेवावान ओसो ओवाजान साथे नी आयो, जिनाक सोमवनेवावा ने रावन्या करी कि हिमी हामरे सी आरू वात मा करे। काहकि वो ओको हुकुमन नी सह सके: “यदि काही जनवार भी बयड़ाक धरे तो ओको पर दगड़ा देयो।” आरू वो दर्शन ओसो भयानक होतो कि मूसा ने कयो, “हाव घोणा घाबरायो आरू कापतो छे।”
पर तुमू सिय्योनन बयड़ा साथे, आरू जीवता यहोवा–भगवानन नगर, सोरगदूत यरूशलेम न, साथे आरू लाखो सोरगदूत। आरू इनु एकखुळिया न साधारण सभा आरू मंडळी, जिन्दरो नाव सोरगदूत मा लिख्यो छे, आरू आखान न्याय यहोवा–भगवानन साथे आरू सिध्द कर्या होया न्यायी की आत्मा। आरू नोवली वाचान मध्यस्थ ईशु आरू छिड़कनेन ओको लुहूय साथे आयो होय जो हाबील न लुहूय छे वारू वात कयता छे।
सावधान रवु, आरू ओको कयनेवावा छे मुय नी फेरो, काहकि वो मानसे जव धरती परन चेतावनी देनेवावा छे मुय भाझीन नी वाच सक्या, तो हामु सोरगदूत पर छे चेतावनी देनेवावा छे मुय भाझीन कोसो वाच सकछे। तीन टेहाव तो तेरो ओवाज ने धरती हालाड़ दिदो, पर हिमी त्यो यो प्रतिज्ञा करी छे, “एक बार पछु हाव नी केवल धरती वरना सोरग न भी हालाड़ दीस।” आरू यो वाक्य “एक बार पछु इन वातक प्रगट करता छे कि जो चीजक हालाड़ जाती छे, वो सृजी होयी चीज होयनेन कारण टल जाछे; ताकि जो चीज हाल नी जाती, वो अटल बन रवे।”
इन कारण हामु इन राज्यम देखीन जो हाल नी सके होय, आरू भक्ति, आरू भय सहित यहोवा–भगवानन ओसी आराधना करू जेरेछे वो खुश होयतो छे। काहकि हामरा यहोवा–भगवान भस्म करनेवावा आगठो छे।
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.