परमेश्वरन सत्य वचन
निर्गमन 8
दुसरी पीड़ा: डेटकान धाड़ु
तव योहोवा ओळी मुसा सी कयो, "फिरोनक पास जाईन कय, 'योहोवा तुखे इनीये रीतिये कय रीयो, म्हारी परजान लोगहन को जाने दे जिना सी कि त्या म्हारी विनता करे। पुण कदाम तु हेनको जाने नी देय ती समळ, हांव डेटकान को मोकलीन थारा सारा देश मा नुक्सान करने वाळो छे। आरु नील नदी डेटका सी भराय जासे, आरु त्या थारा भवन मा, आरु थारा आथरुन पर, आरु आदिकारीयान घरो मा, आरु थारी परजा पर, थारा चुला आरु पीठु कुसननेन परात मा बी चढ़ जासे। आरु थार पर, आरु थारी परजा, आरु करमचारिया, पर आखा डेटका चढ़ जासे।" ओळते योहोवा मुसा को हुकुम दीदो, "हारुन सी कय दे, कि नोंदीया, नहरोम, आरु झीलोन ऊपर लाकड़ी क साथ मा हाथ अगो कोरीन डेटकान को मिसर देश पोर चढ़ाय ली आवे।" एकालिय हारुन मिसरन पानीन जागा पर आपसा हाथ को बढ़ायो; आरु डेटका मिसर देश पर चढ़ीन उका पर वेरवाय गया।1 आरु नजरबान्दा बी आपसा तंत्र मंत्र सी तिने रीतिये मिसर देश पर डेटका चढ़ाय ली आया। तव फिरोन मुसा आरु हारुन को बुलावीन कयो, "योहोवा सी विनता करो कि त्यो इनु डेटकान को म्हार सी आरु म्हार परजा सी दुर कर देय; आरु म्हार इसराएली लोगहन क जाने दीस। जेरेसी त्या योहोवा क लिय बलिदान चोड़ावसु। तब मुसा न फिरोन सी कयो, ओतरी वात क लिय मेसे हुकुम आप दे कि हेमी तारे आरु तारा कामकोरन्या, आरु मानसो क निमित्त कोत्यार विनता कोरो, की योहोवा तारे पास सी आरु तारा घरो मा सी डेडरा क छेटा कोर, आरु त्या केवल नील नदी मा ओतरेत रोवे। हुयो कयो, “वाहने।” हुयो कयो, “तारा बुलोन क ओनसारे होयसे, जेरेसी तुख यो जानाय जाय की आमरो परमेश्वर योहोवा क जसो कोय दिसरो नी होय। आरु डेडरा तारे पास सी आरु तारा घरो म सी तारा कामकोरन्या आरु मानसे क पास सी छेटो होईन केवल नदी मा रोहसे।” तोत्यार मुसा आरु हारुन फिरोन क पास सी निकळ गोया; आरु मुसा न हेनु डेडरा क वाराम, योहोवा क विनता आप्या ज त्या फिरोन पोर मुकल्या हुता। आरु योहोवा न मुसा क कोहने क ओनसारे कोर्यो; आरु डेडरा घोरोम, आँगना, गाँव आरु खेतोम मा मोर गोया। आरु मिसर देशन लोगहन एकठा करीन ओको ढेर लागाड़ देदा, आरु आखा देश भुंडात गोंद सी भोराय गोयो। बाखुन जब फिरोन न देख्यो की हेमी आराम जोड़्यो छे ती योहोवा क कोहने क ओनसारे हुयो ओळी आपना मोनोक वातड़ो कोर्यो, आरु हेनकी नी सोमळ्यो।
पिसाळान टुळो
ओळी योहोवा न मुसा सी कोयो, “हारुन क हुकुम आप, तु आपनी लाकड़ी ओगु कोरुन धोरती क धुळा पोर दे, जेरेसी हुयो मिसर देश भरीन मा पिसाळा बोन जाय।” आरु हुये होसात कोर्या जसो; यानी हारुन न लाठी क लिन हात ओगु कोरिन धोरती क धुळा पोर देदो, ती मानसो आरु ढुरे दुयो पोर पिसाळा होय गोय, बाखुन आखा मिसर देश मा धोरती क धुळु पिसाळा बोन गोय। तोत्यार जादुगरो न चाहाय्या की आपना तंत्र-मंत्र क ताकोत सी हामु वी पिसाळा लि आवजे, बाखुन यो हेनुसी नि होय सोक्यो। ओस करीन मानसो एने डुरो दुयो पोर पिसाळा बोनी रोही, आरु होर जागे पीसाळात हुता। तोत्यार नजर बांदा फिरोन सी कोया, “यो ते परमेश्वर क हातन काम छे।”2 तेवी योहोवा क कहने क ओनसारे फिरोन क मोन वातड़ो होयतो गोयो, आरु हुयो मुसा आरु हारुन क वात नी मान्यो, जसो योहोवा कयो हुतो।
चवथी पिड़ा: माखान टुऴ
ओळतेन योहोवा न मुसा सी कयो, “सोंदारे उठिन फिरोन क ओगळ उबो होयनो, हुयो ते जळ क भैनी आवसे, आरु हेरेसी कोहजी, योहोवा तारेसी यो कोहे छे: मारु प्रजा क मानसो क जाने दे की हुये मारु विनता करे। काहमाइन तु मारु प्रजा क नी जाने देसे ती सोमोळ, हांव तार पोर आरु तारा कामकोरन्या आरु तारा मानसो पोर, आरु तारा घरो मा टुळुन टुळुन डांसीया मुकलीस; आरु मिसर लोगहन क घर आरु ओक रोहने क धरती वी डांसीया सी भोराय जासे। तेने दाहड़े हांव गोशेन देश क जेरेम मारी प्रजा रोहे छे ओलोग कोरिस, आरु हेरेम माखान क टुळा होयसे; जेरेसी तु जान लेय की कळीन विच मा3 हांवज् योहोवा छे। आरु हांव म्हार लोगहन आरु तार लोगहन मा फोरोक राकीस। यी सोहलानी चमत्कार वाहने होयसे।” आरु योहोवा न तसोत कोर्यो, आरु फिरोन क भवन आरु उना कामकोरन्या क घरोम मा, आरु आखा मिसर देश मा माखान टुळान टुळा भोराय गोया, आरु माखान क मारे हुयो देश नाश हुय गुयो।4
तोत्यार फिरोन न मुसा आरु हारुन क बुलावीन कोयो, “तुमु जाईन आपना परमेश्वर क लिय एना देश मा बलिदान चड़ावु।” मुसा न कोयो, “ओसो कोरनो वारु नी; काहकी हामु आपना परमेश्वर योहोवा क लिय मिसरियो क घाड़ायन सोमान बलिदान कोरसु; आरु काहमाइन हामु मिसरियो क देखता उना घाड़ायन सोमान बलिदान कोरजे ती काय हुये आमरे पोर दोगाड़ाटसे नी? हामु सुनला जंगल मा तिन दाहड़ा क चालो पोर जाईन आपना परमेश्वर योहोवा क लिय जसो हुयो हामरे सी कोहसे तसाज् बलिदान चड़ावसु।” फिरोन न कयो, “हांव तुमक जंगल मा जाने दिस की तुमु आपना परमेश्वर योहोवा क लिय सुनला जंगल मा बलिदान चड़ावु; पुन जादा म्हाय घुन जाता, आरु म्हार लिय विनता कोरु।” तोत्यार मुसा न कोयो, “सोमळ, हांव तारे यां सी खोयड़े जाईन योहोवा सी विनता कोरीस की माखान क टुळो तारे, आरु तारा कामकोरन्या, आरु हेका लोगहन क पास सी वाहनेत छेटो होये; बाखुन फिरोन ओगो कोरीन हामु योहोवा क लिय बलिदान करने क जाने देने क लिय मोना झुणी कोरे।” मुसा न फिरोन क पास सी खोयड़े जाईन योहोवा सी विनता कोर्यो। आरु योहोवा न मुसा क कोहनेन ओनसारे माखान टुळा क फिरोन, आरु उना कामकोरन्या, आरु ओकी प्रजा सी छेटो कोर्यो; याँ लोगुन की एक वी डांसीयो नी रोयो। तोत्यार फिरोन न एन वार वी आपसा काळ्जाक वातड़ो कोर लेदो, आरु इसरायली लोगहन क जाने नी दिदो।
Source notes (4)
- Cross-reference भजन संहिता 78:45
- Footnote “यो ते परमेश्वर क हातन काम छे।” आंगळी
- Footnote कळीन विच मा देशोन वीच मा
- Cross-reference भजन संहिता 78:45
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.