परमेश्वरन सत्य वचन
निर्गमन 4
मुसा क लिये विनछेळाय तकोत जोड़नो
तव मुसा जवाब दीदो, त्या तार पर विश्वास नी करे आरु नी म्हारी समळे, पुन कयसे, योहोवा तुखे दर्शन नी दीदो।
योहोवा देव मुसा सी कयो, “तारा हाथ मा त्यो काय छे?” मुसा बोलियो “लाकड़ी।”
योहोवा देव कयो, ओको धरती पर न्हाख दे। जव मुसा उको धरती पर न्हाक दीदो तव त्यो घोड़सो बन गयो, आरु मुसा उना सामने सी ढास गीयो। तव योहोवा मुसा सी कयो, हाथ बढ़ावीन ओकी छेमटी धर ले, काहकी त्या लोगहन विश्वास करे कि तुमरा आड़ाबुड़ा क परमेश्वर मतलब अबराहम क परमेश्वर, इसहाक क परमेश्वर, याकुब क परमेश्वर, योहोवा तुखे दर्शन आपलो छे। ओस कोरीन चे भुरसु कोरसे जव हाथ बढ़ावीन उको धर लीदो तव त्यो उना हाथ मा पछी लाकड़ी बन गय। अबराहमन परमेश्वर इसहाकोन परमेश्वर आरु याकुबोन परमेश्वर मेसे दोरसोन आप्यु
ओळी योहोवा मुसा सी यो बी कयो, तारो हाथ छाती पर मेलीन ढाक ले। तसोत् मुसा उना हाथ छाती पर मेलीन ढाक लीयो; ओळते जव उको निकाळीयो तव यो देख्यो कि उको हाथ कुढ़न कारण बोरोफ क सारको धवळीयो हुय गयो। तव योहोवा मुसा सी कयो, “तार हाथ छाती पर मेलीन ढाकले।” आरु मुसा ओको हाथ छाती पर मेलीन ढाक लीदो; आरु जव मुसा ओको हाथ छाती पर सी निकाळीयो ती यो देख्यो कि त्यो ओळी आखा डीलोन तसो हुय गीयो। तव योहोवा कयो, “कदाम त्या तारी वात पर विश्वास नी करे, आरु पेहली सोहलानी को नी माने, ती दिसरी सोहलानी पर विश्वास करसे। आरु कदाम त्या इनु दुयु सोहलानी पर विश्वास नी करे आरु तारी वात को नी माने, तव तु नील नदी मा सी थुड़क पानी लीन सुखली धरती पर न्हाकजी; आरु जो पानी तु नदी सी निकाळीस त्यो सुकली धरती पर लुहुय बन जासे।”
मुसा योहोवा सी कयो, “ए म्हारा पोरबु। हांव बुलने मा पाको नी हय, नी ते पेहले हुतो, आरु नी जव सी तु तारा दास सी वात करने लागीयो; हांव ते मुयन बुबड़ो आरु जीभ को गुंगड़ो छे।”
योहोवा मुसा सी कयो, मानुस को मुय कुन बनायो? आरु मनुस को गुँगड़ो, या बेहरो, या देखने वाळो, या आंधवो, मखे छुड़ीन कुन बनावे? अब जा, हांव तारा मुय सी जो काय तुखे कयनो छे त्यो तुखे सिखाड़तो जाईस।
त्यो कयो, “ए म्हारा पोरबु, थार सी विनती छे कि तु कुदा दिसरा मनुस को मोकली दे।” तव पोरबुन रीस मुसा पोर भड़की। पोरबु कयो, काय लेवी ओवलियादन हारुन तारो भाईन नी होय? हांव जानो कि त्यो वारलो बुलसे देख, त्यो तार सी मिळने आय रोयो। जव त्यो तुसे देखसे तव आपसा काळजजा मा खुश होयजी। तु उनासी वार कोरजी। आरु ओको बताड़जी की काय कोरनो छे, हांव तुको आरु उको बुलने मा मदत कोरीस। आरु तुमुक काय कोरनो छे, यो सिकाड़ीस। हारुन तारे भेनि सी म्हार लोगहन सी वात कोरसे, त्यो तारो बुलन्यो हुयसे, आरु तु हेका लिय परमेश्वर सारको कोवायसे। तु आपसा पुठी लाकुड़ ली जाजी, तु हेरे लारे मोटा काम कोरनेन सोहलानी देखाड़ीस।
मुसा मिसर देश पोछो जानो
मुसा वां सी चाली गुयो। त्यो आपसा सेसरा यितरो क पास गुयो। हेको कयो, मेसे जाने देवु हांव आपसा भाय बोन्या क पास, जे मिसर देश मा छे पोछा ली आवो। हांव जाईन देखीस की काय त्या हेमी जिवतला छे, यित्रो न मुसा सी कयो, “वारु शांती सी जा।” पोरबु न मिद्यान देश मा मुसा सी कयो, मिसर देश क लौटी जा; काहकी जे लोगहन तारा जीव लेनो चाहता हुता, त्या आखा मोर गोयला छे।1 मुसा न आपसी लाड़ी आरु पुर्या क गोदड़ा पोर बोसाड़्यो आरु मिसर देश भेनी निकळ्यो, आरु मुसा न परमेश्वर न उना लाकुड़ को लेदो।
तव योहोवा न मुसा सी कयो, जव तु मिसर देश मा पुगे तव धियान रोहे कि जे मोटला काम हांव तारा होक मा कोरल छे उना आखा क फिरोन क देखाड़जी; पुन हांव हेनको मोन वातड़ो कोरीस, आरु त्या म्हार लोगन क जाने नी देये। आरु तु फिरोन सी कोहजो, योहोवा असो कोहे छे, कि इस्राएल म्हार पुरीया पुन मारो पेहलो पुर्यो छे, आरु हांव ज तुसे कोहलो छे कि म्हार पुर्या क जाने दे की त्या म्हार वायदान चाखरी कोरे; आरु तु न हेमि लगुन हेको जाने नी देदो, एना कारण हांव हेमी तारा मोटला पुर्या को मारीस।2
तव असो हुयो कि वाट मा धोरोमसाहवा मा योहोवा न मुसा को मार नाखनो चाहाया।3 तव सिप्पोरा न एक धारवाळो दगड़ो लीन आपसा पुर्यान खाल क काट नाखी, आरु मुसा क पायोम यो कोहीन नाख देदा, छाचिन तु म्हार लिय लुहुय उहवाड़ने वाळो म्हारो धेनी छे। तव योहोवा न हेको छुड़ देदो, उना टेमे खतना क कारण त्या बुली, “तु लुहुय उहवाड़ने वाळो धेनी छे।”
तव योहोवा न हारुन सी कयो, “मुसा सी मिळने कोरीन जंगल मा जा।” त्यो गुयो आरु परमेश्वर क बोयड़ा पोर उनासी मिळ्यो आरु मुसा को गुळु देदो। तव मुसा न हारुन को यो बतलायो कि योहोवा न काय काय वात कोविन हेको मुकल्यो छे, आरु काहनली काहनली सोहलानी देखाड़नेन हुकुम हेको आपलो छे। तव मुसा आरु हारुन ज जाईन इसराएलीयो क आखा डाहडा क एकठा कोर्या। आरु जोतरी आखी वात योहोवा न मुसा सी कोयो हुतो ची आखी वात हारुन न हेको समवाड़्यो, आरु लोगहन क डुळा अगळ त्या सोहलानी वी देखाड़्या। आरु लोगहन न हेनको विश्वास कोर्या; आरु यो समळीन कि योहोवा न इसराएलीयोन फोम करीयो आरु हेनका दुख पोर निंगा कोरलो छे, त्या मुनका नेचा करीण वांद्या।
Source notes (3)
- Cross-reference मत्ती 2:20
- Cross-reference निर्गमन 12:29
- Cross-reference उत्पत्ति 17:14
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.