निर्गमन 30

धूप धपाड़नेन वेदी

(निर्गमन 37:25-28)

1“ओळी धुप दपाड़ने वाटे बाबळीयान लाकड़ान वेदी बनावजी। 2ओकी नाम्बाय एक हातन आरु चवड़ाय एक हातन हुयनो जुळे, त्यो च्यार कुनीयो हुयनो जुळे, आरु ओकी उचाय दुय हातन हुयनो जुळे, आरु उना सींगड़ा उना टुकड़ा सी बनाया जासे। 3आरु वेदीन उपर वाळा पल्‌ला आरु च्यारो मेरन टेकान आरु सींगड़ाक चुखा सोना सी ढाळड़जी, आरु हेनको च्यारो मेर सोनान एक वाड़ बनावजी। 4आरु ओकी वाड़न नेचो उना आमने-सामनेन दुयो पल्‌लान पर दुय-दुय सोनान कड़ीया बनावीन हेनका दुयु तरफ लगाड़जी, त्या हेनको हाकलने वाटे डान्डान काम देसे। 5डाण्डान को बाबळीयान लाकड़ान बनावीन हेनको सोना सी ढाळजी। 6आरु तु उको उना परदान ओगळ राखजी जो गवान चिट्ठी सन्दुकन सामने छे, मतलब पछतावान ढाकनान ओगळ जो गवान चिट्ठी उपर छे, वांत् हांव थार सी मेळ भेट करीया करीस। 7आरु उनी वेदी पर हारुन वारु गंधायने वाळो धुप धपाड़ीया करे; दाहड़ीन सोन्दारे जव त्यो दीवा ओ ठीक करे तव त्यो धूप धपाड़े, 8आरु सांतेन टेमे जव हारुन दीवलीयान को धपाड़े तव धूप धपाड़्या करे, यो दुप योहोवान सामने तुमरी पीढ़ी पीढ़ी तक जोलम धपाड़ीया करे। 9उनी वेदी पर कोय दिसरी भाँतीन दुप नी धपड़नो, आरु नी उना पर होमबली आरु नी ते अन्नबलि चढ़ावजो; आरु नी ते उना पर अर्घ देजो। 10हारुन साल मा एक वार सींगड़ा पर पछतावो करे; आरु तुमरी पीढ़ी-पीढ़ी मा सालम एक वार पछतावन पापबलिन लुहुय सी इनीये रितिये पछतावो करता जाय; यो योहोवा वाटे चुखा मा चुखो छे।”

जीवोन पछतावान रीपिया

11तव योहोवा मुसा सी कयो, 12“जव तु इसराएलीयान गिनती लेने लाग्या, तव गिननेन टेमे जिन्दरी गिनती हुय गई त्या आपसा-आपसा जीवोन वाटे योहोवा क छुटकारान करता, भगवान को किमत आपसु जिना सी तु हेनकी गिनती करतो रये उनी टेमे काहय पीड़ा हेनको उपर संकट नी आय पड़े। 13जतरा लोगहन गिनाय जाय त्या चुखला जागान शेकेलन अनसारे आदा‍ शेकेल आपे, यो शेकेल वीस गेरान हुये, योहोवान भेट आदो शेकेल1 हुयनो जुळे।2 14विस साल क एने हेरेसी जादा वेवोसता क जोतरा गिनाय जाय हेरेम सी एक एक जोनु योहोवा क रुपीया आपे। 15जब तुमरा जीवो प्राण क पछतावो क निमित्त योहोवा क रुपीया चोड़ायो जाय, ती नी ते धोनवान मानसे शेकेल सी जादा आपे; आरु नी गोरिब मानसे हेरेम सी कोम आपे। 16आरु तु इसराएलीयो सी पछताव क रुप्‌या लिन मिलापवाळा तम्बु क काम मा लागाड़े; जेरेसी हुयो योहोवा क ओगळ इसराएलीयो क फोमकरनेन सोहलानीन कोहाये, आरु होका जीवो क पश्चाताप वी होये।”

पीतळन मोटलो तपलो

17योहोवा न मुसा सी कयो, 18धुवने क लिय पितळ क एक मोटलो तपलो, आरु ओक जोड़लो वी पितळन बोनावजु। ओक मिलापवाळा तम्बु आरु वेदीन विच मा मेकिन ओक मा पानी भोर देनो;3 19आरु हेरेम हारुन आरु उना पुर्या आपना आपना हात पाय धुया कोरे। 20जव जव हुये मिलापवाळा तम्बु मा भोराया कोरे ती ती हुये हात पाय सी धुवे, नी ती मोर जासे, आरु जब जब हुये वेदी क पास सेवा चाखरी कोरने, यानी योहोवा क लिय हवन धोपाड़ने क आवे ती ती हुये हात पाय धुवे, ओसो नी होय की उको मोर जाय। 21यो हारुन आरु ओसी पीढ़ी पीढ़ी क ओवलियाद क लिय होमीसा क विधी कोहाये।

अभिषेक क तेल

22ओलतेन योहोवा न मुसा सि कोयो, 23“तु वारु सी वारु गोंदायन्या मोसाला ले, यानी चुखलाजागा क शेकेल क ओनसारे पाच सोव शेकेल4 आपने आप निकाळ्यो हुयो गोंदायनीयो रस, आरु ओक आधो, यानी ढाई सोव शेकेल5 गोंदायन्यो मोसालाम वाळो झाड़ोन पुपड़ो, आरु ढाई सोव शेकेल गोंदायन्यो अगर मसालो, 24चुखला स्थानक तेलक अनसारे छोव किला तेजपान आरु चार लिटर जैतुनन तेल लेनु। 25हेनुसी आंगे कोरलो चुखलो तेल, यानी गन्दायनीयान रीती सी तियार कोर्‌यो हुयो गोंधायन्या तेल बोनावनो; यो अभिषेक क चुखो तेल कोहाये। 26आरु हेरेसी मिलापवाळा तम्बु क, आरु गोवान चिट्ठी सन्दुक क, 27आरु आखा सोमान भेळ टेबलन, आरु सोमान भेळ भीतन, आरु धुपवेदीन, 28आरु आखा सोमान भेळ होमबली, आरु पाया भेळ मोटला तोपलान को सजाय देजो, 29आरु ओक चुखो कोरनो, जेरेसी हुयो परम चुखलो कोहाये; आरु ज काय हेरेसी छिम्यो जासे त्यो चुखो होय जासे। 30ओळी हारुन क हेका पुया क सात अभिषेक कोरनो, आरु ओस कोरिन हेनुक मारे लिय याजक क काम करने क लिय चुखो कोरनो। 31आरु इसराएलीयो क मारी यी हुकुम सोमवाड़नो, यो तेल तुमरी पीढ़ी पीढ़ी मा मारे लिय चुखो कोरलो तेल होयसे। 32यो कुदा मानुस क डिल पोर नी नाख्यो जाय, आरु मिलावट मा ओक जसो आरु काई नी बोनजो; यो चुखलो छे, यो तुमरे लिय वी चुखलो होयसे। 33ज काई ओक जसो काई बोने, एने जो कुदु एरेम सी काई पारका कुलवाळा पोर लागाड़े, हुये आपना मानसो मा सी नाश होय जासे।”

चुखलो वारु गंदायनीयो धुप

34ओळी योहोवा न मुसा सी कोयो, “बुल, नखी आरु कुन्दरु, ये गोंदायन्या चिज चुखला लोबान भेळ ली लेजो, यी सब एक तोल क होय, 35आरु ओक धुप यानी नोन भेसकीन गंदायनेन रीतीन ओनसारे चुखो आरु चुखो गोंदायन्यो चिज बोनावनो। 36ओळी हेरेम सी काहिन दोविन झिनो कोर देजो, ती हेरेम सी काई मिलापवाळा तम्बु मा गोवापत्र क ओगळ, जा पोर हांव तारसी मिळ्या कोरीस, राखजी; हुयो तुमरे लिय परम चुखलो होयसे। 37ज धूप तु बोनाविस, मिळावट मा ओक जसो तुमु मानसे आपने लिय आरु काई नी बोनावनो; हुयो तुमरे ओगळ योहोवा क लिय चुखलो होयसे। 38ज काई सुंगने क लिय ओक जसो काई बोनावे हुयो आपना मानसो मा सी एक जन छे। ओका तरह नी हिवनो जासे।”6