परमेश्वरन सत्य वचन
निर्गमन 24
योहोवा भगवान आरु इसराएली लोगोन वीच मा वायदा
ओळी मुसा सी कयो, तु, हारुन, नादाब, अबीहु, आरु इसराएलीयान सत्तर डाहडान को सात लावीन योहोवा भगवान क पास मा आवीन दुर सी आराधना कोरजी। आरु मुसा अतरोत योहोवा भगवान क पास मा आवजी; पुन त्या लोगहन पास मा नी आवनो, आरु दिसरा लोगहन उना सात मा ऊपर नी आवनो। तव मुसा लोगहन को पास मा जाईन योहोवा भगवान नी सब वात आरु सब नियम कायदा सुना दियो; तव सब लोगहन एकसारको रेंग निकाळीन बुलने लाग गीया। “जतरी वात योहोवा भगवान कयलो छे उनी सब वातोन को हामु मानसु।” तव मुसा योहोवा भगवानन सब वचन को लिख दीदो। आरु सोन्दारे उठीन बयड़ान नेचा एक बेदी आरु इसराएलन बारे गोत्रान ओनसारे खम्बा बनवाड़ीया। तव त्यो घण सवटा इसराएली जवानीया को मोकलीयो जे योहोवा क लिए होमबली आरु पशु को मेलबलि चढ़ावे। आरु मुसा आदो लुहुय लीन वाटका मा राखीयो, आरु आदो बेदी पर छिड़की दीदो। तव वाचान किपात को लीन लोगहन को भनीन सुनायो; उनी किताब को सुनीन त्या ळोगहन कया जो काय योहोवा भगवान कयलो छे उनी सब वात को हामु करसु, आरु ओको हुकुम मानसु। तव मुसा लुहुय को लीन लोगहन पर छिड़की दीदो, आरु उन लोगहन सी कयो, देखो, यो उनी वाचान लुहुय छे जिनीक योहोवा भगवान इनु सब वचन पर तुमरे साते बांधलो छे।1
तव मुसा, हारुन, नादाब, अबीहु आरु इसराएलीयान सत्तर डाहडा बयड़ा पर गीया, आरु इसराएलन योहोवा भगवान को दरशन करीया; आरु उना पायो तळे नीलमणीन सारको पाटलो हुतो, जो वादळा सारको जुगाळो हुतो। आरु त्यो इसराएलीयान डाहडा पर हाथ नी बढ़ायो; तव त्या लोगहन योहोवा भगवानन दरशन करीया, आरु खादा पीदा।
सिनाय बोयड़ा पोर मुसा
तव योहोवा भगवान मुसा सी कयो, बयड़ा पर म्हारे जुळ चढ़ीआव आरु वाँ सारी रय; आरु हांव तुको दगड़ान पट्टिया, आरु म्हारा लिखला नियम आरु हुकुम आपीस कि तु उन लोगहन को सिकाड़े। तव मुसा योहोसु नावन ओको मदतगार योहोवा भगवानन बयड़ा पर चढ़ी गीया। आरु डाहडा सी त्यो यो कय गयो, “इव तक हामु तुमरे जुळ पछा नी आवजे, तव तक तुमु यात् हामरी वाट जुळता रयजु; आरु समळो, हारुन आरु हुर तुमरे सात मा रयसे; ती कदाम कुदा मनुस को काहय नियाव करनो हय ती हेनको पास जाजो।”
तव मुसा बयड़ा ऊपर चढ़ी गीयो, आरु वादळो बयड़ान को ढाक लीदो। तव योहोवान विजाळो सीनाय बयड़ा पर उतर आयो, आरु त्यो वादळो उना पर छव दाहड़ा तक छावयलोत् रीयो; आरु सातवे दाहड़े योहोवा भगवान मुसाक वादळान वीच मा रईन आयड़ीयो। आरु इसराएलीयान नजर मा योहोवा भगवानन विजाळो बयड़ान कातर पर घण जबर धोदेकतला आगठान सारको देखाय देतो हुतो। तव मुसा वादळान वीच माईन भराईन बयड़ा पर चढ़ी गीयो। आरु त्यो बयड़ा ऊपर चालीस दाहड़ा आरु चालीस रात तक रीयो।2
Source notes (2)
- Cross-reference मत्ती 26:28; मरकुस 14:24
- Cross-reference व्यवस्थाविवरण 9:9; मत्ती 4:2; 1 राजा 19:8
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.