परमेश्वरन सत्य वचन
निर्गमन 17
चाफरीया मा सी पानी निकाळनो
ओळी इसराएलीयान आखी मण्डळी सीन नावन जंगल मा सी निकळीन जाने लागी, आरु योहोवान हुकुम अनसारे थुड़ाक अगा जाईन रपीदीम जागाम मा हेनका डेरा उबा करीया; आरु वाँ त्या लोगहन को पीनेन पानी नी जड़ीयो।1 एकालिय हुये मुसा वाद विवाद कोरीन कोहने लाग्या, “आमुक पीने क पानी आप।” मुसा न हेनुसी कोयो, “तुमु मार सी काहा वाद-विवाद करु? आरु योहोवा क पारोख काहा कोरु?”2 पुन उना लोगहन को पीस लागी, ती हुये यो कोहीन मुसा पोर बुड़बुड़ायने लाग्या, “तु हामरा बाळ-बोच्चा आरु ढुरो भेळ तिसला मारने क लिय मिसर सी काहा ली आयो?”3 ती मुसा न योहोवा सी विनता कोर्यो, आरु कोयो, एनु मानसो साते हांव काय कोरो? ये आखा मेसे दोगड़ाटने क तियार छे। योहोवा न मुसा सी कोयो, “इसराएलन डावा होयला मानसो मा सी थुड़ाक क आपसे पुठी ली गोयो; आरु जेनी लाकुड़ सी तु न नील नोदी पोर देदलो हुतो, ओको आपसा हात मा लीन मानसो क ओगोळ चाल। देख, हांव तारे ओगोळ चालीन होरेब बोयड़ा क एक चाफुर पोर उबु रोहीस; आरु ओको तु हेनी लाकुड़ को चाफुर पोर देजी, ती हेरेम सी पानी निकळसे, जेरेसी ये मानसे पीये।” ति मुसा न इस्राएल क डाहला मानसोन डुळा देखता होसोत कोरीयो। आरु मुसा न हेना जागा क नाव मस्सा4 आरु मरीबा5 पाड़्यो, काहकी इसराएलीयान न होया वाद-विवाद कोरला हुता, आरु योहोवा क पारोख यो कोहीन कोर्या की, “काय योहोवा आमरे विच छे की नी?”
अमालेकियो पोर जीत
ऐरे वाद अमालेकी जाति आविन रपीदीम मा इसराएलीयो सी लोड़ायने लाग्या। ती मुसा न योहोसु सी कोयो, “आपने जुगु काई मानसो क नेवाड़ ले, आरु वाहने खोयड़े जाईन अमालेकीयो सी लोड़ाये; आरु हांव काल परमेश्वर क म्हार लाकुड़ हात मा लीन बोयड़ा क चोटी पोर जाईन उबु रोहीस।” जसो की मुसान हुकुमन ओनसारे योहोसु अमालेकियो सी लोड़ायने लाग्यो, आरु मुसा हारुन आरु हुर बोयड़ा पोर चोहोड़ गुया। जोत्यार लगुन मुसा आपसा हात उचा कोर रोहतो हुतो ति लोगुन इस्राएल जीतता हुता; बाखुन जोत्यार जोत्यार हुयो नेचो कोरे ती ती अमालेक जीतता हुता। पुन जव मुसान हात घबराय गुया, तव हारुन आरु हुर न एक दगड़ो नेचो मेक देदो। आरु मुसा उना पोर बोठ गुयो, आरु हारुन आरु हुर एक एक वाहळा मा हेनका हातोक समाळ रोया; एक जेवड़े भेनी आरु एक डाखरे भेनी उका हात दाहड़ु डुबने लगुन उचा कोरला रोया। आरु योहोसु न आपसा लोगहन क साथ अमालेकियो क तलवार क ताकोत सी हाराय दिदो। तव योहोवा न मुसा सी कयो, यी वात किपात मा फोम राखे क लिय लिख ले आरु योहोसु क समवाड़ दे, कि हांव वादवा क नेचो सी अमालेकी जाती क फोम राखनेन सोहलानी आखो बुरवी दीस। ती मुसा न एक वेदी बोनावीन ओको नाव “योहोवा निस्सी6” राख्यो; आरु त्यो कोयो, योहोवा क झंडो धोर रोव, योहोवा अमालेकियो सी पीढ़ी सी पीढ़ी लोगुन पोरबु क लिय हामरो लोड़ाय होयतो रोहसे।
Source notes (6)
- Cross-reference गिनती 33:12,14
- Cross-reference गिनती 20:3
- Cross-reference निर्गमन 14:12
- Footnote मस्सा परखना
- Footnote मरीबा विवाद
- Footnote निस्सी योहोवा झंडा हें
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.