परमेश्वरन सत्य वचन
सभोपदेशक 3
सब काम क टेम पाको छे
हर एक वातन एक मुखो आरु हर काम क, जो सोरगन नेचो हुये, एक टेम छे। पयदा हुयनेन टेम, वेरनेन टेम; आर वेरलान क उखाळनेन बी टेम छे; मारनेन टेम, आरु आरगो करनेन बी टेम ढोळी देनेन टेम, आरु बनावनेन बी टेम छे; रोड़नेन टेम, आरु हासनेन टेम, दु:ख करनेन टेम, आरु नाचनेन बी टेम छे; दगड़ा न्हाकनेन टेम, आरु दगड़ान क एखटा करनेन बी टेम, गळे मिळनेन टेम, आरु गळे मिळने सी रुकायनेन बी टेम छे हेरनेन टेम, आरु खुवनेन बी टेम, वाचाड़ीन मेलनेन टेम, आरु न्हाकनेन बी टाकलो टेम छे। फाड़नेन टेम, आरु सीवनेन बी टेम, हुगा रयनेन टेम, आरु बुलने बी पाको टेम छे। मोंग करनेन टेम, आरु किचवायनेन बी टेम; लड़ायनेन टेम, आरु मेळाका हुयनेन बी टेम छे। काम करने वाळान क हेकी मेहनत सी काय फायदो हुये? हांव देखीयो की परमेश्वर मानसो पोर कोतरो दुखोन भार नाखलु छे। त्यो सब काय असो बनायो कि आपसी टेम पर त्या घाटाळा रये; ओळी त्यो मानुसन मन मा जलोम रयने वाळो गियान पयदा करीयो, ते बी जो काम परमेश्वर करीयो, त्यो शुरु सी लीन आखरी तक मानुस समझी नी सके। हांव यो जान लेदो कि मानुसन करता सुक करने आरु जीवन भरीन भलाय करने सिवाय, आरु दिसरो काहलो बी काम वारु नी हय; आरु यो बी परमेश्वरन दान छे कि मानुस खाय- पीये आरु आपसा सब मेहनत मा सुख सी रये। हांव यो जानो कि जो काय परमेश्वर करे त्यो जलोम बनलो रयसे; नी ते उनामा काहय वोदाड़से आरु नी ते घटाड़से; परमेश्वर असो अतरान करीन करे कि लोगहन हेकी बीक माने। जो काय हुयो त्यो इना सी बी पेहले हुय चुकीयो; जो हयने वाळो छे, त्यो बी हुय चुकलो छे; आरु परमेश्वर वितली वातोन क वोळी-वोळी पछो करे।
दुनिया मा नियाव नी जड़नो
ओळी हांव दुनिया मा काय देखियो कि नियावन जागा मा अन्यायन काम हुये, आरु वारला जागा मा बी भुण्डला कामे हुये। हांव मन मा कयो, परमेश्वर धरमी आरु कुमनिया दुयन क नियाव करसे, काहकी हेका पास मा एक एकन वाराम आरु एक एक कामन टेम छे। हांव मन मा कयो, “यो अतरान करीन हुय रीयो कि परमेश्वर मानुसन पारख करे कि देख सके कि त्या जनवार सारका छे।” काहकी जसी मानुसन वसीत् जनवारीयान बी हालत हुये; दुयन चीत हालत रये, जसो एक मरे तसोत् दिसरो बी मरे। आखान सांस एक सारकी छे, आरु मानुस जनवारीया सी बढ़ीन नी हय; सब काय वायबार छे। आखरी मा सब एकुत् जागा मा जात रये। आखा धुळाम पछा भेसकाय जाय। काय मानुसन जीव उपर जाय आरु जनवारीयान जीव नेचो जाईन धुळा मा भेसकाय जाय? यो कुन जाने? हांव यो देखीयो कि इना सी काय वारु नी हय कि मानुस आपसा कामोम खुश रये काहकी हेको वाटो योत् छे; कुन हेको पछळ हुयने वाळी वातोन क पछो देखाड़ सके?
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.