परमेश्वरन सत्य वचन
आमोस 5
पश्चातावो करनेन बुलावो
ऐ इसराएलोन घोराना, इना दुखोन गीतोन बुल सोमवु जो हांव तुमरे वाराम कोवो इसराएल देस कुवारी पुराय छे जी हिट पोड़ी, आरु ओळी उठी नी सोके; होयी आपसीत् जागा पोर हिट पोड़ली छे, आरु उठाड़नेवावो कुदु नी। काहकि परमेश्वर योहोवा ओसु कोवे। जिना सोहोरोम गोथा होजार निकेवता होता, तिनाम इसराएलोन घोरानान सोवुत् वाचला रोवसे, आरु जेरेम गोथा सोव निकेवता होता तिनाम दोस वाचला रोवसे।
योहोवा, इसराएलोन घोराना काजे ओसु कोवे, मारी हेर मा लागु, ती जिवतेला रोवसु। बेतेलोन हेर मा झुन लागु, नी गिलगाल मा भोरायु, आरु नी बेरसेबा जावु; काहकि गिलगाल छाचिन गुलामी मा जासे, आरु बेतेल सुनलो पोड़से।
योहोवान हेर कोरु, ती जिवतेला रोवसु, नी ते हुयो युसुफन घोराना पोर आगठा सारको भोड़ेकसे, आरु हुयो तिनुक नास कोरसे, आरु बेतेल मा कुदु उलेवने वावो नी रोवसे। ऐ नियाव काजे जोहोर वाळी वात मा बोदेलनेवावा आरु छाची नियाव काजे धुवा मा भेसेकनेवावा! जे नानला तारा आरु होयनीन सिंगड़ान तोसा चोमेकन्या तारा बोनावनेवावु छे, जु बेसका आंधाराक वी सोंदारेन विजावो बोनावे, जु दाहड़ान आंधारो कोरीन रात बोनाय देये, आरु दोरीयान पानी सुकला जागा उपोर उहवाड़ देये, तेरो नाव योहोवा छे। हुयो ताकोत वाळान क तेतारुत् नास कोर देये, आरु किला काजे वी आखो नास कोर देये। जु नियावोन मिटिंग मा गुनु लागाड़ देये हेरेसी चे घाड़ाय रोवे, आरु वारली वात कोरनेवावा सी कुहराय कोरे। तुमु गोरब्या काजे वेला पाड़ु, आरु हेन्दरा ओन पोर फाळु कोरीन मांग लेतला, एरकरिन जे तुमु दोगड़ान घोर बोनावला छे, तिनुम रोय नी सोकु; आरु जो गोंहतो ओन्गुरोन वाड़ी तुमु लागाड़ला छे, तिनु ओन्गिरन रोस नी पी सोकु। काहकि हांव जानो कि तुमरा गुना भारी छे कि तुमु वारला मानसो काजे वेला पाड़ु आरु पोस्या मांगु, आरु झोपला पोर गोरब्यान नियाव काजे बिगाड़ु। ओतरान कोरता जे समझदार होय, चे एने टेमे हुगा रोवे, काहकि टेम वारु नी होय। ऐ मानसो, बुराय नी, भोलाय काजे हेरु, कि तुमु जिवतेला रोवु; आरु सेनाओन परमेश्वर योहोवा छाचिन तुमरेत् पुठी रोवसे, जोसा तुमु कोया कोरत्ला। बुराय सी सीगी आरु भोलाय सी मोंग राखु, आरु नियावोन मिटिंग काजे एक जागे कोरु; काय जानु सेनाओन परमेश्वर योहोवा युसुफन वाचला पोर गिन कोरे। ओतरान कोरता सेनाओन परमेश्वर पोरबु योहोवा ओसु कोवे: “आखा चोवराया मा रोड़नो कोलेपनो होयसे; आरु आखी वाटो मा मानसो हाय, हाय, कोरसे!” चे किरसान्या काजे रोड़ने जुगु, आरु जे मानसे कोलेपने मा पाका छे, तेनुक रोड़ने कोलेपने बुलावसे; आरु आखा ओन्गुरोन वाड़ीया मा रोड़नो कोलेपनो होयसे, “काहकि योहोवा ओसु कोवे, हांव तुमरे इचमा गोथु होईन जाइस।”
हाय तुमरे पोर, जे योहोवान दाहड़ान होर कोरता होय! योहोवान दाहड़ा तुमरा काय नोफान होयसे? हुयो ते विजावान नी, आन्धारान दाहड़ा होयसे। जोसु कुदु नाहार सी ढासे आरु तिनाक रिछड़ो मेवाये; एने घोर मा आविन भितड़ा पोर हात मेके आरु घोड़सु तिनाक ठुनकाय देये। काय यो छाचो नी होय कि योहोवान दाहड़ा विजावान नी, पुन आन्धारात् जुन होयसे? हाव, ओसो बेसको आन्धारो जेरेम काय वी चोमके नी। हांव तुमरा तिहवार सी सिगी कोरो, हेनुक हांव नी मानो, आरु तुमरी मोटली मिटिंग सी हांव खुस नी। चाहाय तुमु मारे जुगु होमबली आरु ओनोन बादा चोड़ावु, तेवी हांव खुस नी होयो, आरु तुमरा पावला ढुरोन बादा भेनी नी भावो। आपसा गीतोन गोगलु मारे गोथा छेटा कोरु; तुमरा वाजान सुर हांव नी सोमवो। पुन नियाव क नदीन सारको आरु छाचाइन आटे नी ओसला खुदरा सारको उहवने देयु। ऐ इसराएलोन घोरान, तुमु जोन्गोल मा चावीस साल लोगुन ढुरोन बादा आरु ओनोन बादा काय मेसेत् काजे चोड़ावता रोया? तुमरा ते राजान तम्बाक, आरु तुमरा मुरतिया न पाटला आरु तुमरा परमेश्वर न तारा लिन फिरे। इना करण सी हांव तमुक दमिश्क न उना पार गुलामी मा कर दिस, सेनाओन परमेश्वर क योत् वचन छे।
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.