परमेश्वरन सत्य वचन
आमोस 2
मोआब
मोआब योहोवा ओसु कोवे: मोआबन ताव तावोन गुनान कोरता, हांव हेरा डोनोक नी छुड़ो, काहाकि होयु एदोमन राजान हाड़का धोपाड़ीन रुखड़ो कोर देदु। एरकरीन हांव मोआब मा आगठो लागाड़िस, आरु हेरेसी करियोतोन मोटलो किला वी नास होय जासे; आरु मोआब गोगलु आरु हुहड़ु आरु मोटला फेपारियान बुल होयतात् मोर जासे। हांव हेरे इचमा गोथु नियाव कोरन्या मुखीन नास कोरीस, आरु पुठि पुठित् हेरा आखा मुखिक वी मार दिस, योहोवान योत् बुल छे।
यहूदा
योहुदा योहोवा ओसु कोवे: योहुदान ताव तावोन गुनान करता, हांव डोन आपनो नी छुड़ो; काहाकि चे योहोवान कायदाक उदुड़ जान्या, आरु मारा नेम काजे नी मान्या; आरु आपसा झुटा देवधानीन कोरता जोतरा हेन्दरा डाहडा चालता होता, चे वी भोटकी गोयला छे। एरकरिन हांव योहुदा मा आगठो लागाड़ीस, आरु हेरेसी योरुसालेमोन किला नास होय जासे,
इसराएलन नियाव
योहोवा ओसु कोवे: इसराएलोन ताव तावोन गुनान कोरता, हांव हेरो डोन नि छुड़ो; काहाकि चे विनगुनाका क रुप्या जुगु आरु गोरब्याक एक जुड़ी खासड़ान कोरता वेच नाखला छे। चे गोरब्यान मुनका पोरुन धुवान वि हाय कोरे, आरु निचवा मानसोक वाटे गोथा छेटा कोरे; आरु बास-बेटा दुयु एक छल्लीन चा जाय, जेरेसी मारा चुखला नाव क विटोळ कोराया। चे आखी बेदीन चा खोन्डला छिन्दरा पोर सुवे, आरु डोनोन रुप्या सी मुले लेदला ओन्गुरोन रोस आपसा परमेश्वरन घोरमा पी लेये। हांव हेन्दरे ओगोव एमोरियान क नाश कोरलो हुतो, जेन्दरी नाम्बाय वेला सारकी होती, आरु जेन्दरु दोम ओंजीर झाड़ सारको होतु; तेवी हांव उपोर गोथु हेरो फोळ, आरु नेचु गोथु हेरा मुवे नास कोरलु। हांव तुमुक मिसर देस गोथु निकाविन लायु, आरु जोंगोल मा चावीस साल लोगुन लिन फिरतु रोयु, कि तुमु एमोरियान देसोन होकदारिया होय जावु। हांव तुमरा पुर्या मा गोथु कागळीया होयने जुगु आरु तुमरा थुड़ाक जुवान मा गोथु नाजीर1 होयने जुगु नेवाड़्यु। ऐ इसराएलिया, काय यो आखो छाचो नी होय? योहोवान यो बुल छे। पुन तुमु नाजीर काजे ओन्गुरोन रोस पाव्या, आरु कागळीया काजे हुकुम आप्या की ओगवाती वात नी कोरे। देखु, हांव तुमुक ओसु डाबीस, जोसा पुवा सी भोरायली गाड़ी नेचो डाबाय जाय एरकरिन जुर्रे दोवोड़नेवावाक ढासने जानेन जागु नी जोड़े, आरु ताकोत वावान ताकोत काहिन काम नी देये; आरु नी जुरो वावु आपसु जिव वाचाड़ सोके; धोंदली वावा उबा नी रोय सोके, आरु उतवाया दोवोड़नेवावा नी वाच सोके; सोवार वी आपसे जीव नी वाचाड़ सोके; आरु हिमोत वावा मा जु जादा गोम खान्यु होय, चो वी तेने दाहड़े नांगरोत् ढास जासे, योहोवान योत् बुल छे।
Source notes (1)
- Footnote नाजीर परमेश्वर काजे चोड़ावलो
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.