परमेश्वरन सत्य वचन
2 कुरन्थियो 4
धरती क पात्रा मा धन
एरकरीन जव हामु पर ओसी दया होय कि हामु यो सेवा मिवी तो हामु हियाव नी छुड़ता। पुन हामु ने लाज क सातायलो काम क त्याग कि दिया, आरू नी चतराय छे चालता, आरू नी यहोवा–भगवान क वचन मा मिलावट करता छे; पुन सच्चाई क प्रगट करीन यहोवा–भगवान क सामने हर एक मानुस क विवेक मा आपसी भलाई बठ्या छे। पुन यदि हामरे खुश खबर भनावने पर परदा पड़्या छे तो यो नष्ट हुयने वाळा ही क करता पड्यो छे। आरू उन विनभुरसीया क करता जिन की बुध्दि इनीये संसार क भगवान ने आंधळी कर दिदो छे, ताकि मसीह जो यहोवा–भगवान क सारखो रूप छे, ओका तेजोमय खुश खबर क प्रकाश वो नी देख सक्यो। काहकि हामु आपने क नी पुन मसीह ईशु क खबर करता छे कि वो पोरबु छे; आरू आपने विषय मा यो कयता छे कि हामु ईशु क कारण तुमरे सेवक छे। एरकरीन कि यहोवा–भगवान ही छे, जो कयो, “आंधारला मा छे दिया चमक्यो” आरू चो हामरे हृदय मा चमक्या कि यहोवा–भगवान की महिमा की उळखने की दिया ईशु मसीह क चेहरा छे चमकता छे।
पुन हामरे साथे वो धन धुवो क ठाहरा मा राख्यो छे कि यो मोटी शक्ति हामरी आरू छे नी, वरना यहोवा–भगवान ही की आरू छे ठेहराय। हामु चार आरू छे तकलीद तो भुकता छे, पर संकट मा नी पड़ता, निरूपाय तो छे, पर निराश नी हुयसे; सताये तो जातो छे, पर त्याग नी जाता छे; पड़्या तो जातो छे, पर नष्ट नी हुयसे। हामु ईशु कि मरला क आपसी देह मा हर टेहाव करता पुगता छे कि ईशु क जीवन भी हामरी देह मा प्रगट होय। काहकि हामु जीवतो जीवन सर्वदा ईशु क कारण मरला क हात मा सौपी जाता छे कि ईशु क जीवन भी आमरो मरलोहार डील मा प्रगट होय। इनीये प्रकार मरला तो हामु पर शक्ति नाखती छे आरू जीवन तुमू पर।
एरकरीन कि हामु मा चो विश्वासन आत्मा छे, जेका विषय मा लिखलो छे, “हाव विश्वास कर्यु, एरकरीन हाव कयो। आखरी मा हामु भी विश्वास करता छे एरकरीन बुलता छे।” काहकि हामु जानता छे कि जो पोरबु ईशु क जीवाड्य, चो हामु भी ईशु मा भागी जाईन जीवाड़छे, आरू तुमरे साथे आपने सामने हजुर करसे। काहकि सब समान तुमरे करता छे, ताकि फोकटन दया घोणा क द्वारा सवटो होयीन यहोवा–भगवान कि महिमा क करता धन्यवाद भी बढछे।
भुरसा मा पाको जीवन
एरकरीन हामु हिम्मत नी हारजे; यद्यपी हामरी बाहेरी मानुस वक्ता हुयसे जाता छे, तभी हामरी भी माही मानुस वक्ता दिन हर दहाडो नवलो होयतो जातो छे। काहकि हामरा पलभर क हलकोसो तकलीद हामरे करता घोणा हिय महत्त्वपुर्ण आरू अमरकाय महिमा पैदा करता जाता छे; आरू हामु तो देखीन होय समान क नी पुन विनदेखियो समान क देखता रयता छे; काहकि देखी होय समान क थुडी ही दाहाड़ा कि छे, पुन विनदेखियो समान अमरकाय बने रवता छे।
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.