परमेश्वरन सत्य वचन
1 थिस्सलुनीकियो 5
ईशु पोछो आवने क करता तियार रवछे
पर हे भाईस, आरू बहनीस इनाक योजना नी की टेहावो आरू काळो विषयमा तुमरे साथे काही लिख्यो जाछे। 1काहकि तुमू आप ठीक जानता होय कि जोसो रात क त्योंटा आवता छे, ओसो ही पोरबु क दहाडू आवनेवाळो छे। जव मानसे कयता होयछे, “कुशल छे, आरू काही भय नी, तो उन पर एक एक विनाश आवसे, पड़से जिना प्रकार भारीस पर पीड़ा, आरू वो काही रीति छे नी वाचछे।” पर हे भाईस, आरू बहनीस तुमू तो आंधारला मा नी होय कि वो दहाडू तुमू पर त्योंटा क समान आय पड्यो। काहकि तुमू सब दिवा की अवलियाद आरू दहाडू कि अवलियाद होय; हामु नी रात क छे, नी आंधारला क छे। एरकरीन हामु दिसरा क समान सुवता नी रया पर जागता आरू सावधान रयो। काहकि जो सुवता छे वो रात ही क सुवता छे, आरू जो नश्या करता हुता छे वो रात ही क मतवावा हुयसे छे। 2पर हामु जो दहाडू क छे, विश्वास आरू मोंग कि झिलम पेहरीन आरू उध्दार कि आश क मुकूट पेहरीन सावधान रया। काहकि यहोवा–भगवान ने हामु रीस क करता नी, पुन एरकरीन ठराय छे कि हामु आपने पोरबु ईशु मसीह क द्वारा उध्दार हासिल कर्या। ईशु हामरे करता इनीये कारण मर्य कि हामु जुवे जीवता होय जुवे मरला होय, सब मिवीन तीनी क साथे जाय। इनीये कारण एक दिसरा क बढ़ावु दिदा आरू एक दिसरा क बढ़ती क कारण बन्या, जोसो कि तुमू करता भी होय।
मंडळी क शिक्षा
हे भाईस, आरू बहनीस हामु तुमू छे रावन्या करता छे कि जो तुमू मा मेहनत करता छे, आरू मसीह जीवन मा तुमरे अगो छे, आरू तुमू शिक्षा देता छे, ओको सन्मान करो। आरू ओको काम क कारण मोंग क साथे उनको खुश ही विजुत क योग्य समझ। आपस मा मेलमिलाप छे रया।
हे भाईस, आरू बहनीस हामु तुमू समझता छे, कि जो उजग्यो नी चालता उनको समझाय, कमजोर, क ढाढंस दुय, निर्बल क संभाली, सब की आरू सहनशीलता देखाय। सावधान! काही छे बुराई क बदल बुराई मा आरू सब छे भी सकी एक दिसरा भलाई करू।
सदा खुशी रयो। निरन्तर प्रार्थना मा लागे रया। हर वात मा धन्यवाद करू; काहकि तुमरे करता मसीह ईशु मा यहोवा–भगवान की योही मरजी छे।
चुखलो आत्मा क नी उलवु। यहोवा–भगवान की आरू आवनेवाळो संदेश क तुच्छ नी जानु। सब वात क पारखने; जो वारली छे ओको धरने रया। सब प्रकार की बुराई छे वाच रवु।
बरकत
शांती क यहोवा–भगवान आप ही तुमू पूरी रीति छे चुखलो कर्या; आरू तुमरी आत्मा आरू जीव आरू डील हामरे पोरबु ईशु मसीह क आवने तक पुरो पुरो आरू निर्दोष सोरक्षित रया। तुमरे बुलनेवावा विश्वास योग्य छे, आरू वो ओसो ही करसे।
हे भाईस, हामरे करता प्रार्थना करू।
सब भाईस क यहोवा–भगवान प्रेम छे नमस्कार करू।
हाव तुमू पोरबु की शपथ देता छे कि यो पत्री सब भुरसीया भाईस क भनीन सोमवाय जाय।
हामरे पोरबु ईशु मसीह क फोकटन दया तुमू पर हुयसे रया।
Source notes (2)
- Cross-reference मत्ती 24:43; लूका 12:39; 2 पतरस 3:10
- Cross-reference इफिसियो 6:13-17
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.