परमेश्वरन सत्य वचन
1 कुरन्थियो 6
मसीहियो मा मुकद्दहावबाजी
काय तुमू मा छे काही क यो हियाव छे कि जव दिसरा क साथे झगड़ा होय तो फैसला क करता जो यहोवा–भगवान क नी जाता ओको साथे जाय आरू भुरसा क साथे नी जाय? काय तुमू नी जानता कि विश्वास मानसे धरतीम क न्याय करसे? एरकरीन जव तुमूक धरतीम क न्याय करने छे, तो काय तुमू नानो छे नानो झगड़ा क भी निर्णय करने क योग्य नी? काय तुमू नी जानता कि हामु सोरगदूत क न्याय करसे? तो काय सांसारिक वात क निर्णय नी कर्या? यदि तुमू सांसारिक वात क निर्णय करने होय, तो काय तीनी क बठछे जो मंडळी मा काही नी समझ जाता छे? हाव तुमू लज्जित करने क करता यो कयता छे। काय सचमुच तुमू मा एक भी बुध्दिमान नी मिवता, जो आपने भाईस भाईस क निर्णय कर सक्या? तुमू मा भाईस भाईस मा मुकद्दमा हुयसे छे, आरू वो भी विनभुरसीया क सामने।
पुन सचमुच तुमू मा मोट दोष तो यो छे कि आपस मा मुकद्दमा करता होय। अन्याय काय नी सहते? आपसी हानि काय नी सहते? पुन तुमू तो स्वयं अन्याय करता आरू हानि पुचाड़ता होय, आरू वो भी भाईस क। काय तुमू नी जानता कि अन्यायी मानसे यहोवा–भगवान क राज्य क वारीस नी होयछे? धूखो नी खावु; नी वेश्यागामी, नी मुर्तिपूजक, नी विनलाज्या काम, नी लुच्चा नी मानुसगामी, नी त्योट्टा, नी लोभी, नी पियक्कड़, नी गाली देनेवावा, नी चुरी करनेवावा यहोवा–भगवान क राज्य क वारीस होयछे। आरू तुमू मा छे कोतरा ओसो ही हुता, पुन तुमू पोरबु ईशु मसीह क नाव छे आरू हामरा यहोवा–भगवान क आत्मा छे धुया गया आरू चुखलो होया आरू न्यायी ठेराया।
देह यहोवा–भगवान की महिमा क करता
सब समान मारे करता वारू तो छे, पुन सब समान लाभ की नी; सब समान मारे करता वारू छे, पुन हाव काही वात क हक तळे नी होयछे। भोजन पेट क करता, आरू पेट भोजन क करता छे, पुन यहोवा–भगवान इनीये क आरू ओको क दुय क नष्ट करसे। पुन डील व्यभिचार क करता नी वरना पोरबु क करता छे, आरू पोरबु डील क देख रेख करता छे। यहोवा–भगवान ने आपसी शक्ति छे पोरबु क जीवाड्या, आरू हामु भी जीवाड़छे। काय तुमू नी जानता कि तुमरो डील मसीह क अंग छे? तो काय हाव मसीह क अंग लीन तीनुक वेश्या क अंग बनावु? कदी नी। काय तुमू नी जानता कि जो काही वेश्या छे संगति करता छे, वो ओका साथे एक तन होय जाता छे? काहकि लिख्या छे: “वो दुय एक डील होयछे।” आरू जो पोरबु की सगति मा रयता छे, वो ओका साथे एक आत्मा होय जाता छे। व्याभिचार छे वाच रयो। जोतरा दिसरा पाप मानुस करता छे वो देह क बाहरता छे, पुन व्यभिचार करनेवावा आपसी ही देह क विरोध पाप करता छे। 2काय तुमू नी जानता कि तुमरी देह चुखलो आत्मा क मंदिर छे जो तुमू मा बठला होया छे आरू यहोवा–भगवान की आरू छे मिव्यो छे; आरू तुमू आपने तुमू आपने नी होय? काहकि यहोवा–भगवान तुमूक दाम आपीन छुटकारो करलो छे, एरकरीन आपसा डील न लारे यहोवा–भगवानन महिमा करू।
Source notes (2)
- Cross-reference 1 कुरन्थियो 10:23
- Cross-reference 1 कुरन्थियो 3:16; 2 कुरन्थियो 6:16
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.