परमेश्वरन सत्य वचन
1 कुरन्थियो 10
इस्राएल क इतिहास छे चेतावनी
हे भाईस आरू बहनीस, हाव नी जुवता कि तुमू इनीये वात छे अनजान रयो कि हामरे सब बाबदादा वादवा क नेचो होतो, आरू सब क दरिया क वीचमा छे पार होय गयो; आरू सब ने वादवा मा आरू दरिया मा, मूसा क बपतिस्मा लेदो; आरू सब ने एक ही आत्मिक भोजन कर्या; आरू सब ने एक ही आत्मिक जल पीदा, काहकि वो ओको आत्मिक चट्टान छे पीता हुता जो ओको साथ मा चालती होती, आरू वो चट्टान मसीह होतो। पुन यहोवा–भगवान उनमा छे घोणा छे खुश नी हुयो, एरकरीन वो जंगल मा डील बिसच होय गयो। यो वात हामरे करता सपनो ठेहर्य, कि जोसो त्या लालस कर्या, वोसो हामु बुरी समान क लालस नी कर्या; आरू नी तुमू मुर्तिपूजक बनु जोसो कि उनमा छे कोतरा बन गया हुता, जोसो लिख्या छे, “मानसे खाने पीने बठ्या, आरू खेलने कूदने उठ्या, आरू एक दिसरा साथे कुकर्म करने लाग्या।” आरू नी हामु व्यभिचार कर्या, जोसो उनमा छे कोतरा ने कर्या; आरू एक दाहड़ा मा तेवीस हजार मर गया। आरू नी हामु पोरबु क पारखे, जोसो उनमा छे कोतरा ने कर्या, आरू घड़सो क द्वारा नष्ट कर्या गया। आरू नी तुमू कुरकुर करो, जिना रीति छे उन मा छे कोतरा कुरकुर करीन आरू नष्ट करनेवावा क द्वारा नष्ट कर्या गया। पुन यो सब वात, जो उन पर पड़ी, सपनो कामो रीति पर होती; आरू वो हामरी चेतावनी क करता जो धरती क आखरी टेहाव मा रयता छे लिखी गयी छे। एरकरीन जो समझता छे, “हाव स्थिर छे” वो चोकचौळीया रये कि कयी गिर नी पड़्या। तुमू काही ओसी परीक्षा मा नी पड़्या, जो मानुस क सहने छे बाहरता छे। यहोवा–भगवान सच्चा छे आरू वो तुम्हे शक्ति छे बाहरता परीक्षा मा नी पड़ने देसे, वरना परीक्षा क साथे निकास भी करसे कि तुमू सह सके।
मुर्तिपूजक क विरोध चेतावनी
इनीये कारण, हे मारे मोंगावु भाईस बहनीस मुर्तिपूजक छे वाच रयो। हाव बुध्दिमान जानीन तुमू छे कयता छे: जो हाव कयता छे, ओको तुमू पारखु। वो धन्यवाद क वाटको, जिना पर हामु धन्यवाद करता छे; काय मसीह क लुहूय करी सहभागिता नी? वो रोटा जिनाक हामु तुड़ता छे, काय वो मसीह की देह की सहभागिता नी? एरकरीन कि एक ही रोटा छे तो हामु भी जो घोणा छे, एक देह छे: काहकि हामु सब ओकी एक रोटा मा भागी हुयसे छे। जो डील क इस्त्राएली छे, उनको देखु: काही बलिदान क खाने वावा यहोवा–भगवान की वेदी क सहभागी नी? पछु हाव काय कयता छे? काय यो कि मुर्ती पर चढ़ाया गया बलिदान काही छे या मुर्ती काही छे? नी, वरना यो कि गैरयहुदी जो बलिदान करता छे; वे यहोवा–भगवान क करता नी पुन साहळा क करता बलिदान करता छे आरू हाव नी जुवता कि तुमू साहळा क सहभागी होय। तुमू पोरबु क वाटको आरू साहळा क वाटको दुयू मा छे नी पीय सकता। तुमू पोरबु की हावज आरू साहळा की हावज दुयू क साझी नी होय सकता। काय हामु पोरबु क रीस देवाड़ने जुवता छे? काय हामु ओको छे शक्तिमान छे?
सब काही यहोवा–भगवान की महिमा क करता
काही मानसे कयता, सब समान मारे करता वारू तो छे, पुन सब लाभ करी नी। दिसरा मानसे सब समान मारे करता वारू तो छे, पुन सब समान छे बढ़ती नी। काही आपसी ही भलाई क नी, वरना दिसरा की भलाई क हेरे। जो काही कस्साइयो क याहा वेचायता छे, वो खावु आरू मन मारो खाय नी क कारण काही नी पुछ्या। “काहकि धरती आरू ओको की भरपूरी पोरबु की छे।” यदि विनभुरसीया मा छे काही तुम्हे नेवता देय, आरू तुमू जाने जुवता, तो जो काही तुमरे सामने राख्य जाय चो खावु: आरू मारो मन क कारण काही नी पुछ्या। पुन यदि काही तुमू छे कये, “यो तो मुर्ती क बलि करी होयी समान छे” तो ओकी कोवनेवावा क कारण आरू आमरो मन विवेक क कारण नी खावु। मारो मतलब तारो विवेक नी, पुन ओको दिसरा क। भला, मारी स्वतंत्रता दिसरा क विचार छे काय पारखी जाय? यदि हाव धन्यवाद करीन साझी हुयसे छे, तो जिना पर हाव धन्यवाद करता छे ओका कारण मारी बदनामी काय होयती छे?
एरकरीन तुमू जुवे खावु, जुवे पीवु, जुवे जो काही करू, सब काही यहोवा–भगवान की महिमा क करता करू। तुमू नी यहूदि, नी यूनानीयो, आरू नी यहोवा–भगवान की मंडळी क करता ठुकर क कारण बनु। जोसो हाव भी सब बात मा सब क खुश राखता छे, आरू आपसा नी पुन घोणा क लाभ हेरता छे कि वो उध्दार देखछे।
Source notes (1)
- Cross-reference 1 कुरन्थियो 6:12
परमेश्वरन सत्य वचन. Copyright © 2025 The Word for the World International and Dhankavi Mandli, Khargon, Raykhed, Nandurbar, Maharashtra 2025. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.