Nɔɔneŋ 64

Kefane fa kegyee

1Wurubuarɛ, nyii maŋ debaŋ keŋ mɛɛ toroŋ nɛ,

lɛɛ ma nyee lee me kɔlare keŋmaase man.

2Weese maŋ lee akpanyanyaŋtena kebake man,

na nombiakumɛɛ yɛɛra nyeempɔkum man.

3Ba te sara be laakemse ŋgba yoosilase nɛ,

be nɔɔwoya kumɛɛ yɛɛ ŋgba baŋdaŋ nyeela nɛ.

4Bɛɛ yoo tɔ balaŋ baŋ be nombia dei nɛ baŋdaŋ,

bɛɛ tɔ wɔ karatetee keŋ bɔɔ ne yee ya.

5Bɛɛ do dɔŋa kakyeŋ lee nombiakumɛɛ keyɛɛ man,

bee kolosi lee mena keŋ baa yo nyɔɔ kɔtase,

bɛɛ yako nyiaa, <Amɔte ne gyaela waa naa daa?>

6Bɛɛ bake nombiakumɛɛ yako nyiaa,

<De bake de nombia ŋan nideli.>

Ampaŋ deniwalaŋ nyeempɔ na ɔ konɔɔ man dana detiŋtɛɛ.

7Mɔna Wurubuarɛ waa mo ɔ baŋdaŋ tɔ wɔ,

baa gooli debokenaŋ man.

8Waa mo be nɔɔwoya bu wɔ fɔɔ,

na waa wɔlɛɛ wɔ,

baŋ pou baa naa wɔ nɛ, baa kpiisi ba nyeeya gyakoloŋ man.

9Balaŋ pou baa yee,

baa gyɔ ŋan pou Wurubuarɛ be yɛɛ nɛ dekpeŋkpeŋ,

na baa gyueŋ ŋan ɔ be yɛɛ nɛ wose man.

10Ŋon ɔ tenɛɛ nɛ waa nyaŋee lee Wurubuarɛ dɔɔ,

na waa yeu kagyoo e,

baŋ pou be konɔɔse man dei nɛ, baa mo gyoorobiiri fa e.