Nɔɔneŋ 57

Kefane fa kekyɔ

1Wii me waraŋase, me Wurubuarɛ, wii me waraŋase,

nawolo nyi nyaŋ te me yeuwɔ kagyoo,

maa yeu kagyoo n beŋkelɛɛ wuluŋ man,

kelii debaŋ keŋ nombiikum kei gyae ke laŋ.

2Mee wii baake Wurubuarɛ Adidote ŋon,

Wurubuarɛ ŋon ɔ ne di me nombia fa maŋ.

3Waa kpila lee adido kaa lɛɛ maŋ,

waa kalana baŋ bɛɛ naase maŋ diyem nɛ,

Wurubuarɛ waa kpila ɔ kegyae na wa anokoare kedi.

4Me doo dinaatese nsana,

me doo wonembia kumɛɛ baŋ bee tirii wonembia nɛ man,

balaŋ baŋ be kela yɛɛ apiase na baŋdaŋ nyeela ŋa,

te be laakemse yɛɛ yoosilase ŋan na bee nɛ.

5Ao Wurubuarɛ, gyina n wose kela adido,

yela n gyoorobiiri ke lɛɛ tɛɛle pou.

6Ba te nyɔɔ maŋ kɔta me dɛɛtɛe man,

ba te yɔkɔse maŋ.

Be te wula bɔɔ me gbɛɛnaa man,

mɔna baŋ gbagba te yale gyoo ke man.

7Me wɔe bɛɛ lɔ maŋ ya, Ao Wurubuarɛ,

me wɔe bɛɛ lɔ maŋ ya,

maa kpee nɔɔneŋ kɛlɛɛ neŋ.

8Ma woo, foŋ,

Adolɛɛ na akyakaa, ɛ koro,

Maa karatɛɛ koro.

9Degbeŋgyoo, maa lese n yele tɛɛlese man,

Maa kpee nɔɔneŋ fa neŋ balaŋ pou man.

10Nawolo nyi n kegyae boe nideli kelii adido,

nya anokoare kedi ne lii ŋɔma man.

11Ao Wurubuarɛ, gyina n wose kela adido,

yela n gyoorobiiri ke lɛɛ tɛɛle pou.