Nɔɔneŋ 51

Kefane sola dukum kamo kyɛɛ

1Ao Wurubuarɛ, wii me waraŋase,

lee n kegyae keŋ taŋ ɔto ya nɛ dɔɔ,

lee n waraŋase kewii beiŋ dɔɔ,

gberaa me dukum leki.

2Faafo ma ayimɛɛ pou leki,

na n ka feefo me dukum kamasɛ lee ma wose man.

3Nawolo nyi ma gyeŋ me nombiakumɛɛ,

te me dukum mɔ doo me siaman wee kamasɛ.

4Nyaageŋ, nyaŋ nyaageŋ kooŋ te me yɛɛ dukum tia,

te me yɛɛ kolo kum n sia man,

mena dɔɔ nyi n bu maŋ fɔɔ na n nombia dei,

nyi n di me nombia na, n nombia doona ke gbɛɛ.

5Ampaŋ ba lola maŋ bo dukum man,

dukum man te me naa kyaŋa maŋ fulu.

6Mɔna n gyaewɔ nyi ma kedoo me naa tɔɔ man koraŋ na, maa di anokoare,

n wola maŋ nyansa botɔɔ keŋ ma weesɛɛ nɛ.

7Mo agyora gberaa maŋ na maa lee,

faafo maŋ na maa wolose kela akaralɛɛ.

8Yela maa nyii kenyaŋee na gyoŋkedi nombia,

yela ma wose keŋ be tekerii maŋ nɛ, ke nyaŋee.

9Kyaŋ n sia wuu lee me dukum dɔɔ,

na n ka feefo me nombiakumɛɛ pou.

10Ao Wurubuarɛ, mo konɔɔ fereŋkyeŋte do maŋ,

na n ka mo feliŋ kpaakpaate do maŋ.

11Naa gegi maŋ lee n siaman ya,

te naa lese n feliŋ fereŋkyeŋ ŋon lee me man ya.

12Yela maa nyiŋ kenyaŋee keŋ doo n nyeekelɛɛ man bela,

na n ke fa maŋ kegyaebii feliŋ, na maa nyii n dei.

13Kenaŋ na maa wola nombiakumɛɛ yɛɛra n gbɛɛneŋ,

na dukum yɛɛra ka bese kɔŋ n gyaŋ.

14Ao Wurubuarɛ, lɛɛ maŋ lee balaŋ kako fɔɔ kedi man,

nyaŋ yɛna Wurubuarɛ ma nyeelɛɛre,

na maa kpee n katenee nɔɔneŋ.

15Degbeŋgyoo, gyuusu me nɔɔsebia,

na me nɔɔ ka toro n yele kalese yako.

16Kedeesa bɛɛ gyoo n sia ya, nafɔ maa mo ŋa kɔna neŋ,

n bɛɛ gyae katoo kedeesa mɔ ya.

17Ao Wurubuarɛ, kedeesa keŋ na gyoo n sia yɛna feliŋ keŋ ne yɔkɔse ka wose,

n be gyae n ke bɛɛ konɔɔ keŋ ne yɔkɔse ka wose,

te kɔ yala koyololo nɛ ya.

18Yela Siyɔn kede ka gyoo n sia,

na n ke baŋ Yerusalɛm akyaŋse ŋan.

19Kenaŋ na baŋ be tenɛɛ nɛ kedeesase gyae ka gyoo n sia,

baa mo wonembu dibiliŋ yɛɛ katoo kedeesa,

na baa mo nunkyue baala deesi n kedeesaboe keŋ dɔɔ.