Nɔɔneŋ 41

Kefane kawee man

1Baŋ bee wii ayematena nɛ, baŋna nyeebam,

Degbeŋgyoo ne lɛɛ wɔ ba wose kekyaŋ man.

2Degbeŋgyoo ne kɛɛ be dɔɔ te ɔ ne yele bɛɛ kyaa kyare,

bɛɛ kala wɔ kpuna baŋ Degbeŋgyoo be hiraa wɔ tɛɛle keŋ dɔɔ nɛ,

ɔ bɛɛ mo wɔ do be kɔlara nyiŋmaa man ya.

3Degbeŋgyoo ne kɛɛ be dɔɔ be kawee dofoŋoŋ dɔɔ,

te ɔ ne yele bee nyiŋ doŋ koro be kawee dofoŋoŋ dɔɔ.

4Me yakowɔ nyiaa, <<Degbeŋgyoo, wii me waraŋase,

kyɔ maŋ kawee, nawolo nyi ma te yɛɛ dukum tia neŋ.>>

5Me kɔlara ne kolosi nombia kumɛɛ lee ma wose man nyiaa,

<<Woromɔ yaa waa yeŋ na ɔ yele ka yo?>>

6Akpaa be man ŋolo de kɔŋ kaa naa maŋ na,

ɔ na beo gyaabii maŋ, mɔna akɛrɛɛ nombia doo ɔ konɔɔ man,

na ɔ ta mo ma wose man nombia gyu ɔ ne kili.

7Me kɔlara pou ne kolosi ma wose man nombia adadawoya man fa dɔŋa,

bɛɛ gyueŋ ma wose man dukum yako nyiaa,

8<<Yeŋ kawee te gyɔ e,

ɔ be gyae waa koro ɔ dofoŋoŋ keŋ dɔɔ ɔ doo nɛ bela ya.>>

9Me dɔɔ gbagba koraŋ,

ŋon mɛɛ mo ma wose lɔ ɔ dɔɔ,

ŋon daa na e na do nyiŋmaa di nɛ,

ta besena ɔ wɔle tee maŋ.

10Mɔna nyaŋ Degbeŋgyoo wii me waraŋase,

na n ke gate maŋ na maa nyiŋ tɔ wɔ kom.

11Ma gyeŋ nyi me nombia na gyoo n sia,

nawolo nyi me kɔlara be gyae baa di me dɔɔ ya.

12Lee me nombia kpaakpaa keyɛɛ dɔɔ n gate maŋ

te n moo maŋ see n siaman kekpaakekpaa.

13Ɛ lese Degbeŋgyoo Iseraetena Wurubuarɛ ŋon yele,

kekpaakekpaa,

Dɛɛkɔŋ mena, ayi, Dɛɛkɔŋ mena.