Nɔɔneŋ 21

Karaŋ nɔɔneŋ fa keyoodi

1Degbeŋgyoo, gyoo ne nyaŋee lee n doŋ keŋ dɔɔ.

Ɔ ne nyaŋee nideli lee keyoodi keŋ n be fa e nɛ dɔɔ!

2N te yɛɛ ɔ konɔɔ man kegyaebii fa e,

n faa e keŋ ɔ ba sola neŋ.

3N moo wose kenyiŋ kaa hiraa e,

n moo kɔba yayam gbagba gyooro kotɔtɔɔ wuu e.

4Ɔ sola neŋ nyeedoŋ te n faa e,

n faa e weeya burum kekpaakekpaa.

5Lee keyoodise ŋan n be fa e dɔɔ, ɔ te lɛɛ yele nideli,

n ta mo gyoorobiiri na obuo fa e.

6Ampaŋ n te hiraa e kekpaakekpaa,

n yelaa ɔ nyaŋeewɔ n siaman.

7Nawolo nyi gyoo na mo ɔ wose lɔ Degbeŋgyoo dɔɔ,

lee Adidote ŋon kegyae keŋ taŋ ɔto ya dɔɔ,

kolo be tale wosi e ya.

8N nyiŋmaa gyae ke tuŋ n kɔlara pou,

n dunoluŋ nyiŋmaa gyae ke kyaŋ baŋ bɛɛ kɔla neŋ.

9Akpaa n lee nyi ɛ ke yoo nɛ,

nyaŋ ka too wɔ ŋgba boalaŋ degyapaa nɛ,

Degbeŋgyoo waa mo ɔ baŋ nedoŋ lila wɔ,

na ɔ boalaŋ ke kpa wɔ dugudugu.

10Nyaŋ ke munu be naanasebia lee tɛɛle dɔɔ,

be duuluŋ man balaŋ pou lee denibalaŋ man.

11Nyi akpaa be bake n nyeeman,

te ba mo nyeempɔkum lee n wose man na, be gyae ke de fa wɔ ya.

12Nyaŋ ke wɔŋ n baŋdaŋ tee wɔ,

na n ke yela baa bese be wɔle yekii.

13Degbeŋgyoo, gate n wose n doŋ man,

dee kpee nɔɔneŋ lese n yele lee n wɔɔle dɔɔ.