Mazimuriyaa 98

S'oossay Alamiyaa Mooddiyaawaa

Mazimuriyaa

1Med'inaa Godaw ooratsa yetsaa yes's'ite;

ayaw gooppe, I malalissiyaabaa ootseedda.

Aa ushechcha kushiinne Aa geeshsha k'eesii

aw s'oonuwaa immeedda.

2Med'inaa Goday bare s'oonuwaa erisseedda;

I ashshiyaawaa kawutetsatoo k'onc'c'isseedda.

3I Israa'eeliyaa soo asaa siik'iyaawaanne

unttunttoo ammanettiyaawaa hassayeedda.

Sa'aa gas'aa gakkanaw de'iyaa Asay ubbay

nu S'oossay ashiyaawaa be'eedda.

4Sa'aa bollan de'iyaa asaa ubbay,

Med'inaa Godaw nashshechchan yes's'ite;

k'aalaa d'ok'k'u ootsiide, nashshechchaa sabaa sabbite.

5Diitsaa Med'inaa Godaw diis's'ite;

diitsaaninne yetsan S'oossaa sabbite.

6S'urumbbaanne lookkuwaa punniidde,

nashshechchan Med'inaa Godaa nu kaatiyaa sintsan hombboc'ite.

7Abbayinne abbaa giddon kumeeddawe ubbay guummo.

Sa'aynne sa'aa bollan de'iyaa ubbay yes's'o.

8Shaafatuu ittippe barenttu kushiyaa bak'k'ino.

K'eeri deretuu Med'inaa Godaa sintsan ittippe nashshechchan yes's'ino.

9Ayaw gooppe, I sa'aa bollan daannatanaw yee.

I ha sa'aa bolla s'illotetsan,

asaa bollakka suuretetsan daannatana.