Mazimuriyaa 96

S'oossay Ubbaappe Bolla Kaatiyaa

1Med'inaa Godaw ooratsa yetsaa yes's'ite;

sa'aan de'iyaa asay, ubbay Med'inaa Godaw yes's'ite.

2Med'inaa Godaw yes's'ite; Aa suntsaa sabbite;

I ashshiyaa mishiraachchuwaa gallassaan gallassaan odite.

3Kawutetsaa giddon Aa bonchchuwaa,

asaa ubbaa giddon Aa malalissiyaa oosuwaabaa awaayite.

4Ayaw gooppe, Med'inaa Goday wolk'k'aama;

gita galatay aw bessee.

S'oossatuwaa ubbaappe aad'd'iide I yayettanaw bessee.

5Hara asaa s'oossatuu ubbay eek'atuwaa;

shin Med'inaa Goday salotuwaa med'd'eedda S'oossaa.

6Bonchchuunne anggay Aa yuushshuwaan de'ee;

minotetsaynne puulay Aa Geeshsha Golliyaan de'ee.

7Hinttenoo, asaa zaretoo ubbatoo,

Med'inaa Godaabaa odite;1

«Bonchchuunne wolk'k'ay Med'inaa Godaassa» giide odite.

8«Bonchchuu Aa suntsaassa»

giide Med'inaa Godaabaa odite.

Yarshshuwaa akkiide, Aa dabaabaa gelite.

9Aa geeshshatetsaa puulan Med'inaa Godaw goyinnite;

biittan de'iyaa asaa ubbaw, Aa sintsan kokkorite.

10Kawutetsatuwaa giddon, «Med'inaa Goday kaateteedda!

Sa'ay min ek'k'eedda; ubbakka k'aas's'enna.

I asaa bolla suuretetsan pirddana» yaagite.

11Salotuu nashetino; sa'aykka hashshu go;

abbayinne Aa giddon kumeeddawe guummo.

12Shoyk'aynne shoyk'an de'iyaa ubbay nashetto!

Woran de'iyaa mitsaa ubbaykka nashshechchan Aa sintsan yes's'ana.

13Ayaw gooppe, Med'inaa Goday yee;

I sa'aa bollan pirddanaw yee;

I ha sa'aa bolla s'illotetsan,

asaa bollakka tumatetsan pirddana.