Mazimuriyaa 84

S'oossaa Golliyaa Laamotussaa

Zammaaretuwaa Kaappoo Suusulatuwaan Yes'etteedda, K'oore Naanatuu S'aafeedda Mazimuriyaa

1Abeet Ubbaappe Wolk'k'aama Med'inaa Godaw,

neeni de'iyaasay ayaa lo"ii!

2Taani Med'inaa Godaa Geeshsha Golliyaa Dabaabaa laamotay;

ta kumentsaa asatetsay de'uwaa S'oossaw nashshechchan yes's'ee.

3Abeet Ubbaappe Wolk'k'aama Med'inaa Godaw,

ta kaatiyaw, ta S'oossaw,

new yarshshiyaa sa'aa matan,

suunniyaa kafatta barew de'iyaasaa demmaaddu.

Harap'p'attakka barew k'uuk'k'ulliyaa golliyaa yaan kees's'aaddu.

4Ne Geeshsha Golliyaan de'iyaawanttunne

med'inaw neena sabbiyaawanttu anjjetteedawantta.

5Wolk'k'aa neeppe demmiyaawanttu,

barenttu wozanaan S'iyoone afiyaa ogiyaa baanaw

amottiyaawanttu anjjetteedawantta.

6Yeekuwaa zanggaaraanna unttunttu aad'd'iyaa wode,

he sa'ay pulttuwaa kesee.

Bad'd'eesaa iraykka bukkiide,

yaan del"iyaa gisissee.

7Unttunttu biyaa wode, wolk'k'aa gujji gujjiide baana.

Unttunttu S'oossaa sintsan S'iyoonen beettana.

8Abeet Ubbaappe Wolk'k'aama Med'inaa Godaw S'oossaw,

ta woosaa neeni sisa.

Abeet Yaak'ooba S'oossaw, hayzza.

9Abeet S'oossaw, nu gonddalliyaa be'a;

neeni dooreedda kaatiyaa ne keeka ayifiyaan s'eella.

10Taani hara sa'aan sha"u gallassaa de'anaappe

S'oossaa golliyaan itti gallassaa de'iyaawe lo"a.

Iitatuwaa dunkkaaniyaan de'anawaappe

ta S'oossaa golliyaa penggiyaa naagiyaawe taw lo"a.

11Med'inaa Goday S'oossay nuw gonddallenne poo"uwaa;

Med'inaa Goday nuw bonchchuwaanne keekkatetsaa immee.

Suuretetsan hamettiyaawantta I lo"obaa ubbaa diggenna.

12Abeet Ubbaappe Wolk'k'aama Med'inaa Godaw,

neenan ammanettiyaawanttu anjjetteedawantta.