Mazimuriyaa 79

Gadiyaa La"atetsaw Shiik'eedda Woosaa

Asaafa mazamuriyaa

1Abeet S'oossaw, Ayhuda gidena asatuu ne biittaa bolla laateeddino.

Ne Geeshsha Golliyaa tunisseeddino;1

Yerusaalame kolereetseeddino.

2Unttunttu ne k'oomatuwaa anhaa,

saluwaa kafoo k'uma ootsiide, immeeddino.

K'ay ne geeshshatuwaa ashuwaa sa'aa do'atoo immeeddino.

3Unttunttu suutsaa Yerusaalame yuushshuwaan,

haatsaadan gusseeddino;

unttunttu anhaa moogiyaawe d'ayeedda.

4Nu shoorotoo nuuni shek'k'iyaawaa gideeddo;

nu heeraan de'iyaawanttu,

miic'c'iyaawaanne k'id'iyaawaa gideeddo.

5Abeet Med'inaa Godaw, hawe awude gakkanaw hananee?

Neeni med'inaw hank'k'ettay?

Ne k'anaatiyaa hank'k'uu tamaadan ees's'anee?

6Neena erenna asatuwaa bollanne

ne suntsaa s'eesenna kawutetsatuwaa bolla ne hank'k'uwaa gussa.

7Ayaw gooppe, unttunttu Yaak'ooba zeretsatuwaa wod'eeddinonne

unttunttu de'iyaasaa bayzzeeddino.

8Kase nu aawotuwaa iitatetsaa nu bolla paydoppa.

Ellekka ne maarotaa nuw kiitta;

ayaw gooppe, nuuni loytsi metooteeddo.

9Abeet nuuna ashshiyaa S'oossaw,

ne suntsaa bonchchuwaa diraw, nuuna maadda.

Ne suntsaa diraw, nuuna ashsha;

nu nagaraa atto yaaga.

10Asatuu ayaw, «Unttunttu S'oossay hak'an de'ii?» yaaganee?

Ne k'oomatuwaa suutsaa unttunttu gusseeddawaa haluwaa,

neeni kessiyaawaa nuuni s'eellishin,

unttunttu gidduwaan k'onc'c'issa.

11K'ashetteedda asatuwaa oolii ne sintsa gakko.

Hayk'oo pirddetteeddawantta ne wolk'k'aa gitatetsaadan ashsha.

12Abeet S'oossaw, nu shooro kawutetsatuu neena boreeddawaa,

haluwaa laappun kushiyaa unttunttu kiwuwaan idintsa.

13He wode nuuni ne asatuu, ne wudiyaa dorssatuu,

med'inaw galataa new immana;

yeletaappe yeletaa gakkanaw neena zaari zaariide galatana.