Mazimuriyaa 72

Kaatiyaw Shiik'o Woosaa

Solomona Yetsaa

1Abeet S'oossaw, kaatii ne suuretetsan pirddanaadan,

neeni Aa tamaarissa;

nu kaatiyaw ne s'illotetsaa imma.

2Yaatooppe, I ne asaw s'illotetsan pirddo;

naak'etteeddawanttookka suuretetsaan daannato.

3Deretuu sarotetsaa ayifiyaa,

zoozetuukka s'illotetsaa ayifiyaa ne asaw ayifino.

4He kaatii asaa giddon naak'etteeddawanttu diraw mootetto;

hiyyeesatuwaa I ashsho;

uk'k'unniyaawantta I mentsereetso.

5Awaynne aginay de'iyaa wode ubbaan,

yeletaappe yeletaa gakkanaw, Asay aw yayiino.

6Kaatii shoyk'an bukkiyaa iraanne

gadiyaa kalissiyaa iraa mala gido.

7I de'iyaa laytsaa ubbaan s'illuu daashana;

aginay d'ayana gakkanaw sarotetsay darana.

8Abbaappe abbaa gakkanaw,

k'ay Efiraas'iisa Shaafaappe sa'aa gas'aa gakkanaw I mooddo.1

9Bazzuwaa asatuu aw hokkino;

Aa morkketuu baana laac'c'ino.

10Tarsseesanne haatsaan dooddetteedda biittaa kaatetuu,

aw giiraa giirino.

Sheebanne Saaba kaatetuu,

aw imotaa ayino.

11Kaatetu ubbay aw gulbbatino;

kawutetsatuu ubbay aw kiitettino.

12Aa s'eesiyaa hiyyeesatuwaa, naak'etteeddawanttanne

maaddiyaawe bayinnawantta I ashshee.

13Hiyyeesatoonne mank'k'otoo I k'arettee;

hiyyeesatuwaa shemppuwaa ashshee.

14Unttuntta naak'uwaappenne makkalaappe I wozee.

Unttunttu suutsay Aa sintsan al"a.

15Kaatii shemppuwaa gam"o;

Sheeba biittaa work'k'ay aw imetto.

Pac'c'ennan aw woosay woosetto;

gallassaa ubbaan I anjjetto.

16Biittan daro katsay mokko;

deretuu katsaan kamettino.

Biittay Liibaanoose derii mokkiyaawaadan katsaa mokko;

maatay dembbaa kumiyaawaadan Asay katamaa kumo.

17Kaatiyaa suntsay med'inaw de'o;

away de'eedda keeshshaa ubbaan s'eegettiidde, gam"o.

Asay ubbay Aa baggana anjjettana;

kawutetsatuu ubbay Aa, «Anjjetta» yaagiide anjjana.

18Malalissiyaabaa barekka ootsiyaa Med'inaa Godaa S'oossaw,

Israa'eeliyaa S'oossaw galatay gido.

19Aa bonchcho suntsay med'inaw galatetto;

Aa bonchchuu sa'aa ubbaa kumo.

Amen"i. Amen"i.

20Issey na'aa Daawita woosay hawaan poletteedda.