Mazimuriyaa 63

S'oossaa Koyussaa

Yihudaa Bazzuwaan de'iyaa wode Daawita mazamuriyaa

1Abeet S'oossaw, neeni ta S'oossaa;

ta wozanay neena laamotee;

ta ashuukka neena amottee.

Meli za"eedda, haatsi bayinna biittaadan

ta kumentsaa asatetsay neena saamettee.

2Taani neena geeshsha sa'aan be'aad;

ne wolk'k'aakka ne bonchchuwaakka taani be"aad.

3Aggena ne siik'uu de'uwaappe lo"iyaa diraw,

ta ins's'arssay neena bonchchana.

4Ta de'uwaa laytsan taani neena galatana;

ne suntsan ta kushiyaa pude mic'c'ana.

5Asay lo"o k'umaa kalliyaawaadan,

ta shemppatta neenan kallana.

Taani ta ins's'arssan nashshechchaa yetsan neena galatana.

6Taani ta gisuwaan neena hassayay;

k'ammaa ubbaan nebaa k'oppay;

7ayaw gooppe, neeni taana maadeeddawaa.

Taani ne k'efiyaa kuwaan uttaade, nashshechchaw yes's'ay.

8Taani ne mata shiik'a uttay;

ne ushechcha kushii taana oyk'k'iide naagee.

9Shin taana wod'ana koyiyaawanttu,

biittaa garssa c'iimmo sa'aan moogettana.

10Unttunttu mashshaw aad'd'iide imettana;

unttunttu babark'k'iyaa kaate gidana.

11Shin kaatii S'oossan nashettana.

S'oossaa suntsan c'aak'k'iyaa ubbay Aa galatana;

shin wordduwaa haasayiyaawanttu doonay gorddettana.