Mazimuriyaa 57

Maaduwaa Demanaw Shiik'eedda Woosaa

Zammaaretuwaa Kaappoo, Gonggolo giddoppe Saa'oolappe bak'atiide bi simmina Daawita Woosaa. «D'ayssoppa» Geetettiyaa Woosaan Yes'etteedda Woosaa.

1Taana maara; abeet S'oossaw, taana maara;

taani neekko bak'atay.

Bashshay aad'd'ana gakkanaw,

ne k'efiyaa giddon bak'ataade attay.

2Taani Ubbaappe D'ok'k'iyaa S'oossaw,

taw ubbabaa ootsiyaa S'oossaw waassay.

3S'oossay saluwaappe maaduwaa kiittiide, taana ashshana;

taana naak'k'iyaawantta kawushshana;

S'oossay aggena bare siik'uwaanne

bare tumatetsaa taw kiittana.

4Taani ta morkkatuwaa giddon,

asaa bonk'k'iide miyaa gaammuwaa malatuwaa giddon de'ay.

Unttunttu achchay tooraanne wonddaafiyaa mala;

unttunttu ins's'arssay kuussa mashshaa mala.

5Abeet S'oossaw, neeni salotuwaappe bollaanna d'ok'k'u d'ok'k'u ga;

ne bonchchuu sa'aa ubbaa bolla de'o.

6Unttunttu ta gediyaw p'iriyaa wotseeddino;

taani metootaade hokkaad.

Unttunttu ta ogiyaan ollaa bookkeeddino;

shin he ollaan barenttoo kunddeeddino.

7Ta wozanay minniide de'ee;

Abeet S'oossaw, ta wozanay minniide de'ee.

Taani new yes's'ananne neena sabbana.

8Ta shemppattee, beegotta!

Diitsawunne maasink'k'oo, beegottite!

Taanikka wontta guuraanna beegottana.

9Abeet S'oossaw, taani neena asaa giddon galatana;

k'ay kawutetsaa giddon neena sabbana.

10Ayaw gooppe, aggena ne siik'uu wolk'k'aama;

salotuwaa gakkeedda.

Ne tumatetsaykka bolla shaariyaadan d'ok'k'ee.

11Abeet S'oossaw,

salotuwaappe bollaanna d'ok'k'u d'ok'k'u ga!

Ne bonchchuu sa'aa ubbaa bolla gido.