Mazimuriyaa 48

S'oossaa Katamati S'iyoono

K'oraaha naanatuwaa mazamuriyaa; yetsaa

1Med'inaa Goday wolk'k'aama.

Nu S'oossaa kataman Aa geeshsha deriyaan aad'd'o galatay aw bessee.

2S'oossaa deriyaa S'iyoone d'ok'k'anne lo"a.1

Pudehaa baggana de'iyaa

He wolk'k'aama kaatiyaa katamay sa'aa ubbaw nashshechchaa.

3He katamaa gimbbiyaa giddon,

barenan saro Asay de'iyaawaa S'oossay besseedda.

4Kaatetuu barenttu tooranchchatuwaanna ittippe shiik'eeddino;

S'iyoone olanaw yeeddino.

5Aa be'iide, maalalettiidinne dagammiide,

bak'ateeddino.

6Unttunttu hewan de'ishiina,

unttuntta yashshaa kokkorssay oyk'k'eedda;

oytsay oyk'k'eedda mishirattiidan un"eteeddino.

7Away doliyaa bagga wolk'k'aama c'arkkuwaan,

me"iyaa Tarsseese markkabiyaadan unttunttu kokkoreeddino.

8Nuuni siseeddawaadankka,

Ubbaappe Wolk'k'aama Med'inaa Godaa kataman,

nu S'oossaa kataman, I ootseeddawaa be'eeddo.

S'oossay he katamaa med'inaw minisi essee.

9Abeet S'oossaw, ne Geeshsha Golliyaa giddon

aggena ne siik'uwaa k'oppeeddo.

10Abeet S'oossaw, ne suntsaadankka,

ne galatay sa'aa gas'aa gakkeedda.

Ne ushechcha kushii s'illotetsaan kumeeddawaa.

11Ne pirddaa diraw,

S'iyoone Asay nashettee;

Yihudaa mootsatuukka nashettiino.

12S'iyoone yuushshuwaan hamettite;

I yuushshuwaan yaanne haanne simerettite.

I wochchiyaa sa'aa paydite.

13Yiyaa yeletaw odanaadan,

izi gimbbiyaa akeekitenne izi aakko gimbbiyaa s'omoosite.

14Hintte, «Med'i med'inaw

ha S'oossay nu S'oossaa;

I nuuna hayk'k'ana gakkanaw kaaletsana» yaagiide odite.