Mazimuriyaa 42

Laa"entso Mas'aafaa

(42—72)

Yedesaa Wode Woosaa

Zammaaretuwaa Kaappoo Yes'etteedda, K'oore Naanatuwaa Akeekaa Timirttiyaa

1Gaaray goggiyaa haatsaa laamotiyaawaadan,

Abeet S'oossaw, hewaadan taanikka neena laamotay.

2«Taani baade, S'oossaa sintsa

be'anawe awudeeshsha?» gaade,

S'oossaa, de'uwaa S'oossaa be"anaw saamettay.

3Asatuu ubbaa gede, «Ne S'oossay hak'an de'ii?»

yaagiyaa wode, taw gallassinne k'amma ta afotsay k'uma gideedda.

4Taani unttunttu baalaa bonchchanaw,

shiik'eedda daro asaa gidduwaana

salppiyaan hombboc'ishiinanne

galataa yetsaa yes's'ishin,

S'oossaa golle kaaletseeddawaa k'oppiyaa wode,

ta wozanay kayyottiidde, giddon seereedda.

5Ta shemppattee, taani ayaw kayyottaytaa?

K'ay ayaw jabbakattayttaa?

Taani S'oossan hidootaa wotsana.

Ayaw gooppe, taani biro

taana ashshiyaawaanne ta S'oossaa galatana.

6Ta wozanay kayyotteedda; hewaa diraw,

taani Yorddaanoosa biittan, Hermmoone d'ok'k'an,

Miizaare Deriyan ek'k'aade neena hassayay.

7Ne soossuwaa guntsan c'iimmuu c'iimmaw s'eesee;

K'ay ne beetaynne ne hobbii ubbay

ta bollaanna goggeedda.

8Gallassi Med'inaa Goday aggena bare siik'uwaa taw kiittee.

K'ammakka Aa yetsay taananna de'ee;

he yetsaykka taani ta de'uwaa S'oossaa woossiyaa woosaa.

9S'oossaa, ta wogga zaallaa taani,

«Ayaw taana dogaadii?

Taani ayaw ta morkkiyaan naak'ettaade kayyotaade hamettoo?» yaagay.

10Ta morkketuu taana,

«Ne S'oossay hak'an de'ii?» yaagiide,

ta mek'etsaa mentsiide boriino.

11Ta shemppattee, taani ayaw kayyottaytaa?

K'ay ayaw jabbakattayttaa?

S'oossan hidootaa wotsana.

Ayaw gooppe, taani ha"ikka

taana ashshiyaawaanne ta S'oossaa galatana.