Mazimuriyaa 4

Maadoo Omarssi Shiik'iyaa Woosaa

Zammaaretuwaa Kaappoo Diitsatuwaan Yes'etteedda, Daawita Mazimuriyaa

1Abeet taana s'illissiyaa S'oossaw,

taani neena s'eesiyaa wode, taw koya.

Taani un"etteedda wode, taana shemppissaadda.

Taw neeni k'arettaade ta woosaa sisa.

2Hinttenoo asatoo, awude gakkanaw ta bonchchuwaa kawushshiitee?

Shori bayinnabaakka awude gakkanaw hintte siik'iitee?

Wordduwaa awude gakkanaw c'addi oyk'k'i kaalliitee?

3Shin Med'inaa Goday S'oossaa asatuwaa

barew dummay wotseeddawaa hintte erite.

Taani Med'inaa Godaa s'eesiyaa wode,

I taw sisee.

4Hank'k'ettite, shin hintte hank'k'uwaan nagaraa ootsoppite.1

Hiis'an gisiyaa wode,

hintte wozanaa biditenne sirp'p'i giite.

5Likke yarshshuwaa yarshshitenne

Med'inaa Godaan ammanettite.

6Darotuu, «Nuuna lo"obaa bessanawe oonee?» yaagiino.

Abeet Med'inaa Godaw, neeni nuuna keeka ayifiyaan s'eella.

7Neeni ta wozanaan wolk'k'aama nashshechchaa kuntsaadda.

Hewenne, katsaa ayifiinne ooratsa woyniyaa eessay,

barenttoo darina nashetiyaa nashechchaappekka dariyaawaa.

8Abeet Med'inaa Godaw,

ne s'alalay taana saruwaan naaga wotsiyaa diraw,

taani gisaade sarotetsaan gem"ishshay.