Mazimuriyaa 38

Un"eteedda Asaa Woosaa

Daawita hassayissiyaawaa mazamuriyaa

1Abeet Med'inaa Godaw, ne hank'k'uwaan taana seeroppa;

ne yiluwaan taana muroppa.

2Ne wonddaafiyaa pootsay taana c'addi diggeeddino;

ne kushiikka taana naak'k'i oyk'k'eedda.

3Neeni lanc'c'eedda diraw, ta bollay pas'a gidena;

ta nagaraa diraw, ta asatetsay sara gidenna.

4Ta iitatetsay di'uwaadan taana muukkeedda;

denddenna wolk'k'aama tookuwaadan taw dees'eedda.

5Taani nagaraa ootseedda eeyyatetsaa diraw,

ta madutsay giishshaa oyk'k'iide s'ink'k'eedda.

6Taan hokkaadinne k'uunnaad.

Gallassaa kumentsaa yeekkaade peeshaad.

7Ta ashuwaa mishuu s'uuggee;

ta bollay pas'a gidena.

8Taani daaburaaddinne nippi gaad;

ta wozanay diddik'iyaa diraw oolay.

9Abeet S'oossaw, ta amuu ubbay new erettee;

taani ooliyaawe neeppe geemmibeenna.

10Ta wozana ayifiyaan diddik'ee;

ta wolk'k'ay is's'ina;

Ta ayifiikka s'eelaa is's'eedda.

11Ta maytsaa diraw,

ta shoorotuukka ta laggetuukka haakuwaan ek'k'eeddino.

Ta dabbotuukka taappe haakkeeddino.

12Taana wod'anaw koyiyaawanttu,

barenttu p'iriyaa taw yeggiino.

Taana k'ohanaw koyiyaawanttu,

«ek'k'ashsha; nuuni neena demmana» yaagiide,

manddiinonne gallassaa kumentsaa ta bolla yaa'iino.

13He wode taani tulle asaa mala, sisikke;

taani duude asaa mala, doonaanne pokikke.

14Ee, taani sisennanne

doonay zaarenna asaa mala.

15Shin abeet Med'inaa Godaw, taani neenan hidootaa ootsay.

Abeet Med'inaa Godaw, ta S'oossaw, neeni taw zaaruwaa immana.

16Taani S'oossaa, «Ta gedii d'ubettina,

unttunttu, ‹Aw hashshu› gaanaadaaninne

ta bolla c'eek'ettanaadan ootsoppa» yaagay.

17Taani kunddana hanay;

ta sakuukka taana yeddennan is's'eedda.

18Taani ta iita oosuwaa paas'ay;

taani ta nagaraa gaasuwaan kayyotay.

19Ta morkketuu goobanne wolk'k'aama;

taana c'oo is's'iyaawanttu c'ora.

20Taani lo"obaa ootsina,

taw iitaa zaariyaa asatuu,

Taani lo"obaa kaalliyaa diraw, taana ek'k'etiino.

21Abeet Med'inaa Godaw, taana yeggoppa.

Abeet ta S'oossaw, taappe neeni haakkoppa.

22Abeet Med'inaa Godaw, taana ashshiyaawoo,

taana maaddanaw elleella.