Mazimuriyaa 28

Maaduwaa Demanaw Woosaanne Galataa

Daawita mazamuriyaa

1Abeet Med'inaa Godaw, ta zaallaw, taani neena s'eesay;

taani neena s'eesina, taw sisa is's'oppa.

Ne c'o"u gooppe,

taani duufuwaa beedda asatuwaa mala giday.

2«Maaddo» gaade taani neena s'eesiyaa wodenne

ne Ubbaappe Geeshsha Dunkkaaniyaakko zaaraadde,

ta kushiyaa mic'c'iyaa wode,

neeni ta watiwatuwaa sisa.

3Iitaa ootsiyaa iita asatuwaana taana gatsaade oyk'k'oppa;

Hewanttu barenttu wozanaan kobabaa k'oppi uttiide,

barenttu doonaan barenttu shooruwaanna sarobaa haasayiyaawantta.

4Unttunttu oosuwaadaaninne unttunttu oosuwaa iitatetsaadan,

unttunttoo c'igga;1

unttunttu kushii ootseeddabaw unttunttoo zaara.

Unttunttoo bessiyaa iitaa unttunttoo zaara.

5Unttunttu S'oossaa oosuwaanne Aa kushii med'd'eeddawaa

dosennan is's'eedda diraw, S'oossay unttuntta kolana;

zaariide unttuntta ubbakka kees's'enna.

6Ta watiwatuwaa siseedda diraw, Med'inaa Goday galatetto.

7Med'inaa Goday taw wolk'k'anne gonddalle;

Ta wozanay an ammanettee;

hewan taani maadettaad.

Hewaa diraw, ta wozanay an nashettee;

taani yetsan Aa sabbana.

8Med'inaa Goday bare asaw wolk'k'aa;

I bare okkeedda kaatiyaa ashshiyaa miis'aa.

9S'oossaw, ne asaa ashsha;

new gidiyaawantta anjja.

Unttuntta heemmiyaawe neena gida;

neeni unttuntta med'inawukka tookka.