Mazimuriyaa 17

Geeshsha Asaa Woosaa

Daawita woosaa

1Abeet Med'inaa Godaw, ta s'illo oochchiyaawaa sisa;

ta waasuwaa hayzza.

Taani c'immenna ins's'arssaappe woossiyaa woosaakko,

ne haytsaa zaara.

2Ta shatintsay ne sintsappe yo;

ne ayifii likke gidiyaawaa s'eello.

3Neeni k'amman taana s'omoosaadda;

ta wozanaa paac'c'aadda.

Shin ta bollappe ayinekka demmakka.

Ta ins's'arssaykka balettibeena.

4Taani hara asatuwaadan iita k'aalaa haasayikke;

taani ne azazuwaa naagiyaa diraw, gene ogiyaa kaallabeykke.

5Ta gedii d'ubettenna mala,

ta tangguu ne ogiyaappe gas'aa kesibeenna.

6Abeet S'oossaw, neeni sisiyaa diraw,

taani neena woossay.

Ne haytsaa taakko zaaraadde,

taani new odiyaawaa hayzza.

7Barenttu morkkatuwaappe bak'atiyaawantta

ne ushechcha kushiyan k'osaade ashshiyaawoo,

ne lo"otetsaa maalalissiyaa ogiyaan bessa.

8Ne ayifiyaa c'iruwaadan taana naaga;

ne k'efiyaa giddon taana k'osa.

9Taana un"i wotseedda iitatuwaappenne

dooddi wotseedda s'ala morkkatuwaa kushiyaappe

taana k'osa.

10Unttunttoo k'areti baawa;

otoruwaan haasayiino.

11Taani biyaasa'aa ubbaan unttunttu taana dooddiino.

Taana biittan aatsi yegganaw s'eelliino.

12Unttunttu barenttoo miyaawaa koyiyaa gaammotuwaa mala;

geeman zuggi naagiyaa wodalla gaammotuwaa mala.

13Abeet Med'inaa Godaw, dendda.

Ta morkkatuwaanna ek'ettaade s'oona;

ne mashshaan iitatuwaappe taana ashsha akka.

14Abeet Med'inaa Godaw, hawaa mala asaappe,

Unttunttu kaac'ay ha sa'aa de'uwaa s'alala gidiyaa asaappe

ne kushiyan taana ashsha.

Neeni unttunttoo minjjeedda boshaan unttuntta mura;

he boshaynne unttunttu naanaatoo gidiide,

unttunttu naanatuwaa naanatookka palaho.

15Shin taani s'illotetsan ne som"iyaa be'ana.

Taani denddiyaa wode, ne mala be'aade nashettana.