Mazimuriyaa 148

Med'etay Ubbay S'oossaa Galato

1Med'inaa Godaa galatite!

Salotuwaan de'iyaawanttoo, Med'inaa Godaa galatite;

bolla d'ok'k'an de'iyaawanttoo, Aa galatite.

2Hinttenoo, Aa kiitanchchatoo,

ubbatuu Aa galatite.

Saluwaan de'iyaa Aa olanchchatoo,

ubbatuu Aa galatite.

3Awaw, aginaw, Aa galatite;

poo'iyaa s'oolinttetoo, ubbatoo Aa galatite.

4Hinttenoo, ubbaappe bolla d'ok'k'an de'iyaa salotoo,

Aa galatite.

Saluwaappe bollaanna de'iyaa haatsatoo,

Aa galatite.

5Unttunttu ubbatuu Med'inaa Godaa suntsaa galatino;

ayaw gooppe, I azazina,

Unttunttu ubbaykka med'etteeddino.

6I unttuntta med'i med'inaw

unttunttu sa'aan sa'aan wotseedda.

Unttunttu ubbakka is's'anaw danddayenna azazuwaa I unttunttoo immeedda.

7Sa'aan de'iyaawanttoo, Med'inaa Godaa galatite!

Abban de'iyaa med'etatoo, wolk'k'aama abbaa c'iimmatoo,

ubbatuukka Aa galatite.

8Hinttenoo, walk'k'antsaw,

shachchaw, shaariyaw, c'aaganaw,

Aa azazuwaa poliyaa gotiyaw,

Ubbatuukka Aa galatite.

9Hinttenoo, deretoo, zoozetoo,

Miyaa ayifiyaa ayifiyaa mitsatoo, zigatoo,

ubbatuukka Aa galatite.

10Mehetoo, do'atoo,

sa'aanna gooshettiyaa med'etatoo,

paalliyaa kafotoo,

Ubbatuukka Aa galatite.

11Sa'aa kaatetoo, kawutetsaa asatoo,

kaappatoo, asaa mooddiyaawanttoo,

Ubbatuukka Aa galatite.

12Wodallatoo, wodoratoo,

c'imatoo, naanaatoo,

Ubbatuukka Aa galatite!

13Unttunttu ubbatuu Med'inaa Godaa suntsaa galatino;

Ayaw gooppe, Aa suntsay ubbaappe bollaanna de'iyaawaa;

Aa bonchchuu salotuwaappekka sa'aappekka bollaanna d'ok'k'an de'ee.

14Aa bagga gidiyaa, aw matattiyaa Israa'eeliyaa asatuu,

Aa galatana mala, I unttuntta minisee.

Med'inaa Godaa galatite!